Грција бара сојузник во Кина

Кинескиот премиер Вен Џијабао, кој престојува во официјална посета на Грција, доби третман од домаќините како нов сојузник и спасител на земјата. А како и да не го пречекаат со отворени раце, откако најави дека е дојден со понуди за подобрување на трговската и туристичката соработка, за откупување делови од неколку грчки пристаништа (меѓу кои и солунското) и за откупување дел од железницата, која е заглавена во долгови. Вен Џијабао за време на тридневната официјална посета се сретна и прошета низ Акропол со грчкиот премиер Јоргос Папандреу, разговараше со претседателот Карлос Папуљас, лидерот на опозицијата Антонио Самарас, претседателот на грчкото собрание и министрите за економија и за туризам.

Освен со 11-те потпишани договори за меѓусебна соработка, Џијабао и вербално истакна дека ја поддржува Грција и смета дека може да излезе од кризата. „Кина верува дека иднината на Грција и конечната победа им припаѓаат на грчкиот народ“, изјави кинескиот премиер. Џијабао побара од Грција да игра поактивна улога во односите меѓу Кина и ЕУ, додавајќи дека сите сме во истиот брод и има потреба од подобрување на односите меѓу Пекинг и Брисел. Медиумите го оценија ова како многу јасна бизнис-зделка - Кина сака подобрување на трговските врски со Европа, а Грција може да биде портата на оваа економска размена.

Очекувано, покрај другите проблеми, на средбите било отворено и прашањето за името, а тоа го објави претседателот на грчкото собрание, Филипос Пецалникос. Тој го уверувал кинескиот премиер дека Грција вложува напори и има добра волја за решавање на спорот со името. „Една држава со долга историја, како што е Кина, може да разбере дека историјата на Македонија е документирано и неприкосновено наследство кое мора да го почитуваат нашите соседи“, истакнал Пецалникос.

Посетата на кинескиот лидер грчките медиуми веќе ја крстија како стратегиско отворање на Грција кон оваа земја и нов курс на политиката на Јоргос Папандреу, со храбри најави дека Пекинг ќе застане зад позициите на Атина, иако таквите шпекулации се околу економските прашања, а не името со Македонија.

Маслиновото масло го освоило Вен Џијабао

Атина - Кинескиот премиер Ван Џијабао го сефтоса грчкото масло. „Признавам дека вечера прв пат пробав грчко маслиново масло. Земав лепче и го мацнав. Мислам дека е многу вкусно“, изјави со насмевка кинескиот премиер при своето обраќање во грчкото Собрание. Искрената изјава беше дочекана со громогласна смеа и аплауз во Собранието и од самиот грчки премиер Јоргос Папандреу.

Секако,, многумина од граѓаните и медиумите различно го протолкуваа коментарот на Џијабао. „Околу 10 милиони Грци-должници не дишеа и навиваа кинескиот премиер да мацне лепче во маслото. Знаат дека ако 900 милиони Кинези научат да мацкаат лепче во грчко масло, не преголема доза, барем една капка колку за мезе, готово е се'! Се спасивме од кризата!“, со доза сарказам коментираат од блогот „Протагон.гр“,

За време на официјалната посета на кинескиот премиер во Грција беа потпишани договори за увоз на грчко маслиново масло и грчки вина во Кина. Како што истакна Џијабао, Кина сака двојно да ја зголеми трговската размена со Грција, со цел да и' помогне да се извлече од кризата.

Својата порелаксирана страна кинескиот премиер ја покажа и кога пред посетата на музејот на Акропол седна во неколку блиски кафулиња и со грчките граѓани разговараше за грчкото секојдневје и проблемите со кои се соочуваат. (М.П.)