Штаб нема, ама истрага за Глигоров - има!

Министерството за внатрешни работи потврди дека пред 11 години е укинат Штабот за оперативна акција „Автомобил“, кој своевремено бил формиран за испитување на околностите околу атентатот врз претседателот Киро Глигоров. Но, од МВР негираат дека тоа значи оти истрагата е запрена, а случајот „атентат“ е ставен ад акта.

На 15-годишнината од одбележувањето на овој немил настан, ваквата информација во јавноста ја пласираше бившиот разузнавач и актуелен лидер на Народно движење на Македонија, Јанко Бачев. Како што појасни тој, според полициската практика, тоа значи дека атентатот повеќе не е предмет на систематско и организирано работење на МВР.

„Не е исклучено документот што го покажа Бачев да е веродостоен. Оперативни штабови се формираат за различни поводи. Но, тоа никако не значи дека е затворен случајот. Тоа не само што не е реално туку и теоретски не е можно,

бидејќи атентатот како кривично дело никогаш не застарува“, вели Иво Котевски, помошник за односи за јавноста на министерот за внатрешни работи. Тој вели дека е сменет само модалитетот за организациско постапување во рамките на МВР.

„Ние и за обични кражби не ги затвораме случаите, се' додека не застарат, а камоли за еден ваков настан“, вели Котевски.

Државниот јавен обвинител Љупчо Шврговски потврдува дека случајот атентат не е затворен, иако признава дека во последниве неколку години немаат нови информации и траги околу овој случај.

„Пред две години го проверивме исказот од наводниот крунски сведок, што ни го посочи ексминистерот за внатрешни работи, Љубомир Фрчкоски. Но, излезе дека доказите што ни ги приложи поранешниот вработен во ДБК н�� се веродостојни, а се однесуваа на фотографијата направена на денот на атентатот од случаен германски турист“, вели Шврговски.

Од скопскиот Кривичен суд, пак, информираат дека случајот со атентатот врз Глигоров кај нив се' уште е во предистражна постапка.

„Истражниот судија своевремено ги издал потребните наредби до МВР. Но, тоа беше во времето по атентатот и оттогаш немаме нови предлози од Обвинителството“, вели судијата Владимир Туфегџиќ, задолжен за односи со јавноста во Кривичниот суд. (Г.Д.)