Обвинување за непотизам на Биотехничкиот факултет во Битола

Невена Груевска, која е докторантка на Битолскиот универзитет, обвинува дека Факултетот станува фамилијарна институција

Битола - „Непотизам царува на Биотехничкиот факултет во Битола“, обвинува битолската докторантка Невена Груевска. Факултетот кој е во состав на Битолскиот универзитет „Св. Климент Охридски“ наместо да го развива и поттикнува образованието и знаењето, станува фамилијарна институција.

Груевска, која целокупниот свој образовен процес го има завршено на истиот овој факултет, каде што во 2009 година магистрирала во првата генерација магистри со успех од 9,75, а од 2005 до 2008 година била ангажирана и како демонстратор на катедрата за месо, вели дека во текот на изминатите десетина години постојано конкурира на објавените огласи за вработување помлади асистенти, но секогаш добива негативни одговори, иако на сите конкурси нејзините карактеристики се со највисоки вредности и целосно исполнети критериуми.

„Најодговорно тврдам дека на Факултетот за биотехнички науки владее невиден непотизам, на кој вработувањето е неостварлив и далечен сон за обичен дипломиран инженер. Тоа е достапно само за одредени кругови луѓе, блиски до внатрешната структура на Факултетот и за членовите на нивните семејства“, обвинува Груевска.

Ова свое тврдење таа го докажува и со најновиот завршен конкурс за асистенти на кој како најдобар е избран м-р Владимир Китановски, инаку син на професор д-р Димче Китановски. Според Груевска, тој е само еден од низата вработени од потесното семејство на професорот на Универзитетот во Битола.

„Професорот Китановски им најде вработување на своите блиски токму на Универзитетот. Така, неговата сопруга, Весна Китановска, на почеток работеше како референт на Факултетот, а подоцна ја префрли на Педагошкиот факултет во Битола. Неговата ќерка Елена Китановска-Ристеска работи во Ректоратот како советник и истовремено е професор по англиски јазик на Биотехничкиот факултет. Петар Алтипармаковски, внук од сестра, го згрижи како возач на службено возило на Факултетот“, набројува Груевска и потенцира дека со своето гласање како член на Сенатот на Универзитетот, проф. д-р Китановски, најверојатно, помогнал за декан на ФБН да биде поставен Љупче Кочовски, кој, пак, бил кум на неговото семејство.

„Можеби револтот ќе беше помал доколку синот на Китановски се издвојуваше со своите квалитети во позитивна смисла и го заслужуваше своето работно место. Но, за жал, тој се запишал како вонреден студент на додипломски студии, бидејќи едвај го завршил средното образование, па не можел воопшто да се запише како редовен студент“, нагласува Груевска, заклучувајќи дека за да се прикаже како најповолен кандидат, кај синот на професорот Китановски биле издвоени единствено неговите солидни познавања на интернет, како и големата желба за научноистражувачка работа.

Непотизам на Битолскиот универзитет практикувале и други професори, вели Груевска, за кои по име и презиме ги именува во писмото што веќе го испратила до премиерот Никола Груевски, запознавајќи го со реалната слика за кадровските решенија на Биотехничкиот факултет во Битола.

Со каков квалитет и капацитет за пренесување знаење располагаат вработените професори и особено нововработените асистенти на овој факултет навестува и интересот за запишување на завршените матуранти во оваа академска година.

„За жал, Биотехничкиот факултет стана најнепосакувана членка на Универзитетот ’Св. Климент Охридски‘. На двата уписни рока се пријавени многу помалку студенти од предвидената квота од Министерството за образование. А згора на тоа, сите пријавени кандидати се со мошне низок просечен успех во текот на школувањето“, вели таа.

На крај, Груевска, која е мајка на три деца, јавно прашува како пред синовите ќе ја оправда отсутноста од домот, изработката на терен на магистерскиот труд, а сега и подготовките и на докторскиот труд.

„Како да ги насочувам своите деца да ги стекнуваат вистинските вредности во животот во својата татковина кога јас не можам соодветно да ги реализирам стекнатите знаења“, вели Груевска.

Деканот на Факултетот за биотехнички науки во Битола, Љупче Кочовски, негира дека има непотизам во установата со која тој раководи. Сепак, потврдува дека синот на професорот Китановски го поминал првиот филтер за вработување. Тој вели дека на конкурсот се јавиле осуммина кандидати кои се' уште имаат право на жалба.

„Тричлена комисија одлучува кој ќе се вработи на Факултетот, се земаат предвид највисоките квалитети. Јас не сум во таа комисија. Од друга страна, нема законска пречка дека професорите не можат да ги вработат своите деца на истата установа, тоа падна на Уставен суд. Но, Факултетот е далеку од непотизам“, вели Кочовски. (А.Б.)