Фабриките да бидат далеку од луѓето

Охрид - Во Македонија конечно да се разграничи каде може да се градат тешки индустриски капацитети, а каде не. Ова е иницијативата на дел од македонските еколошки здруженија, кои вчера почнаа национална кампања за дополнување на Законот за животна средина.

Со оваа кампања која има за цел да не се повторат лошите искуства со Топилницата во Велес, се бара ограничување или дефинирање на растојанието на кое може да се градат нови индустриски капацитети, зависно од типот на индустријата, како и потенцијалното загадување кое го предизвикува соодветната фабрика.

Од Еколошкото друштво „Грашница“, од Охрид, потенцираат дека ако фарми и отпади се градат надвор од населени места, тогаш тоа мора да важи и за индустриските капацитети.

„Оваа иницијатива е позитивна и за граѓаните и за потенцијалните инвеститори затоа што нејзината цел е да се забрани градење на тешка индустрија во близина на населени места и заштитени подрачја, со што ќе се определат строги растојанија од населените места каде што би можело да се изгради еден таков капацитет“, вели Ѓоко Зороски, од ЕД „Грашница“.

За поднесување на оваа иницијатива до Собранието потребно е да се соберат 100 потписи. (Е.М.)