Мекејлеб најефикасен во победата на Фенербахче



Нашиот репрезентативец оствари учинок од 17 поени и пет асистенции во триумфот на Фенербахче на гостувањето кај Олимпија со 81:75

Кошаркарите на Фенербахче ја запишаа втората победа во најсилното европско клупско натпреварување, Евролигата.

Предводени од нашиот репрезентативец Лестер Бо Мекејлеб кој постигна 17 поени и додаде пет асистенции, екипата од Истанбул славеше над Љубљанска Олимпија со 81-75.

Одлуката за победникот падна во последната четвртина, а до тој момент екипата од Словенија се држеше доста добро. Покрај нашиот репрезентативец, најефикасни на натпреварот беа Богдановиќ со 14, Батист и Онан со 13 поени, а во редовите на домаќинот најефикасни беа Бејнс со 14 поени и 12 скокови и Препелиќ со 13 поени.

Вистински дебакл доживеа шампионот Олимпијакос, кој загуби со 98:72 на гости кај Анадолу Ефес. Перо Антиќ за 15 минути постигна пет поени и имаше четири скока.

Владо Илиевски со Цедевита претрпе пораз во салата „Дражен Петровиќ“ во Загреб од Емпорио Армани со 71:83. Илиевски за 15 минута даде два поени и имаше една асистенција. Маркис Грин кој има македонски пасош постигна два коша и забележа пет асистенции и три украдени топки за 25 минути.

Резултати, 2. коло, Евролига

Унион Олимпија - Фенербахче 75:81

Химки - Реал Мадрид 86:85

Анадолу Ефес - Олимпијакос 98:72

Цедевита - Емпорио Армани 71:83

Каха Лаборал - Жалгирис 71:77