Македонија ќе скокне 21 место на ФИФА листата!



„Црвено-жолтите“ во ноември ќе бидат една од четирите селекции со најголем напредок на листата заедно со Нигер (+30), со Мјанмар (+27) и со Боливија (+21)

Победата над Србија од 1:0 во квалификациите за Светското првенство 2014 на македонската репрезентација ќе и' донесе напредок од 21 позиција на листата на ФИФА во ноември, на која Македонија се очекува да се искачи на 83. место со 431 бод. „Црвено-жолтите“ во ноември ќе бидат една од четирите селекции со најголем напредок на листата заедно со Нигер (+30), со Мјанмар (+27) и со Боливија (+21).

Покрај Македонија, од групата А од мундијалските квалификации само уште Белгија ќе забележи сериозен напредок од цели десет позиции, осамнувајќи на 20. место со 881 бод. Хрватска повторно се враќа во топ-10, а останатите три репрезентации ќе доживеат значително назадување на листата. Србија ќе биде 42. (-9), а девет места назад ќе оди и Велс. Најголемо назадување ја очекува Шкотска од 56. на 70. место.

На врвот нема да има промени на водечките две позиции: Шпанија останува пред Германија, а понатаму следуваат Аргентина, Португалија, Италија, Англија, Холандија итн.