Британски инженери произведоа нафта од „заробен“ воздух

Група инженери од една мала технолошка фирма во северна Англија, произведоа нафта, користејќи само „заробен воздух“.

Според технологијата што ја разви оваа фирма, покрај воздухот, за производството на нафта е потребно уште струја.

Инжeнерите од компанијата „Ер Фјуел Синтезис“, објаснуваат дека јаглерод диоксидот собран од атмосферата се меша со натриум хлорид, а сето тоа заедно минува низ процес на електролиза, што потоа натаму технолошки се разработува. Претставник на комапнијата соопшти дека досега се произведени пет литра ваква нафта, за што биле потрошени помалку од ��ри месеци работа.

Тестови се правени во една мала рафинерија кај местото Стоктон-он-Тиз, а нафтата добиена од заробен воздух, што потоа ќе се преработи во бензин ги има истите својства како и „вистинската“ нафта.

Целиот проект, што бил развиван во изминатите две години, вреди околу 1,1 милиони фунти, а енергетски експерти го оквалификуваат како „револуционерен чекор“.

Инженерите вклучени во проектот објаснуваат дека тргнале од идејата оти технологијата може да се искористи за создавање на нова енергија. Големите нафтени компании, засега не покажуваат интерес за овој проект, што се објаснува со нивните големи потреби за нафта за преработка, како и со долгото време што е потребно за да се добие синтетичка нафта.