„Златна зора“ трета по рејтинг во Грција

Крајнодесничарската партија „Златна зора“ е трета политичка сила во Грција, покажуваат податоците од анкетата, спроведена од агенцијата ВПРЦ, а објавена во весникот „Елада аврио“.

Според истражувањето на прво место е Коалицијата на радикалната левица СИРИЗА со 30,5 отсто, а втора е Нова деморкатија со 27 осто, која победи на изборите во јуни оваа година.

„Златна зора“ е на трето место со 14 проценти од гласовите, а по неа следат „Независни Грци“ со седум проценти и Грчката комунистичка партија со 6,5 отсто.

Социјалистичката ПАСОК, која е дел од коалициската Влада, останува на шесттото место со 5,5 отсто од гласовите на анкетираните. Со еднакви проценти е и третиот партнер во владината коалиција на премиерот Андонис Самарас, Демократска левица.

Резултатите од анкетата покажуваат дека највисок рејтинг имаат лидерите на СИРИЗА и Демократска левица Алексис Ципрас и Фотис Кувелис, а по нив следи премиерот Самарас.

Осумдесет и еден процент од анкетираните сметаат дека работите во земјата се движат во погрешна насока, а 78 отсто не се согласуваат со новите рестриктивни мерки.