Место ред, МРТ направи хаос со сметките

На иста адреса пристигнуваат по две, три, па и повеќе сметки. Граѓаните се чудат од каде им се на МРТ податоците за членовите на семејството

Даниела Трпчевска
Мирче Јовановски


Наместо средување на списокот со граѓани кои треба да плаќаат радиодифузна такса, Македонската радиотелевизија направи вистински хаос деновиве кога во повеќето поштенски сандачиња остави по неколку сметки на иста адреса. Ако досега еден член плаќаше такса, сега често се случува во едно семејство да добијат и по три-четири сметки. Курцшлусот со сметките предизвика револт во повеќе градови, како што се Тетово, Куманово, а од вчера и во главниот град на земјава, каде што незадоволните корисници ги опседнаа шалтерите на Управата за јавни приходи и на јавниот сервис, барајќи одговор за настанатиот хаос. Од УЈП се оградуваат и упатуваат на МРТ, а оттаму, пак, во штурото соопштение не дадоа одговор од каде им се податоците на сите граѓани и според кои критериуми ги вметнале во списокот во кој никогаш не биле, ниту, пак, требало да се најдат. Така, наместо да го прочисти списокот од починати или отселени лица, како и да направи освежување со новите адреси на оние што се преселиле, МРТ дополнително го обремени и го наду со илјадници нови имиња.

„Ќерка ми 20 години живее во Норвешка и има двојно државјанство - норвешко и македонско. Тука се води на моја адреса, но радиодифузната такса отсекогаш ја плаќам јас. Но, вчера се зачудив кога ми пристигнаа две сметки. Радиодифузна такса се бара да платам јас, но и ќерка ми која со години не живее тука“, вели една наша читателка од Скопје, која вознемирена се прашуваше што треба да направи. Таа се прашува дали порано податоците за граѓаните кои треба да плаќаат такса за МРТ биле ажурирани според сметките за струја, а сега можеби се користат податоците кои граѓаните ги оставаат при вадење лични документи.

И во Куманово состојбата со сметките за телевизија е хаотична. Во овој град има масовни појави сите членови на семејството добиваат сметка за плаќање на радиодифузна такса.

„Ни стигнаа сметки за мене и за сопругата, а соседот се пожали дека кај него на истата адреса стигнале три сметки. Веднаш се јавивме на бесплатниот број на Контакт-центарот на УЈП 0800 33 000, кој го има на сметките. Оттаму ни рекоа дека станува збор за грешка во системот и дека таа наскоро ќе биде исправена. Не посоветуваа да платиме само една сметка и да не се грижиме за другите“, вели нашиот читател од Куманово, Слободан Цветковиќ. И кај него постои дилемата од каде им се податоците на МРТ за имињата на членовите на семејството и каде е тука заштитата на личните податоци, како и дали со ова се прекршува законот за заштита на личните податоци.

Завчера, револтот ескалира и во Тетово каде што имаше и такви примери сметки да пристигнат и на починати лица. Еден од граѓаните изнервиран прокоментира дека кај него решение за радиодифузна такса не стигнало само за домашниот миленик – кучето.

Од Управата за јавни приходи велат дека тие само ги дистрибуираат решенијата за радиодифузна такса, како и дека според законските прописи МРТ е надлежна за водење на регистарот на обврзници. Од Управата категорично демантираат дека податоците за новите претплатници на МРТ произлегуваат од списоците на даночните обврзници кои ги има УЈП.

И покрај тоа што вчера упорно се обидувавме да стапиме со надлежните за изработка и водење на регистарот на претплатници во МРТ, до кои испративме и писмено прашање од каде им се имињата на граѓаните кои ги вметнале во списокот, оттаму пристигна само кусо соопштение во кое им се извинуваат на граѓаните за направениот пропуст.

Станува збор за августовските и септемвриските сметки. Според МРТ, доцнењето на сметките беше поради изготвување нов регистер на корисници во кој требаше да се избришат починатите лица и оние што се отселени и живеат во странство. Но, наместо ред во податоците, се направи целосна збрка за која граѓаните сега ќе треба самите да ја исправаат и да висат на шалтерите на МРТ или телефонски да се јавуваат.

Според информациите од МРТ, по пречистувањето, регистарот за физички лица опфаќа околу 520 илјади претплатници, додека состојбата со фирмите е појасна биде��ќи се потпира на податоците од Централниот регистар, каде што се евидентирани 110.000 фирми.

Од МРТ соопштуваат дека ажурирањето на податоците било направено поради промените на имињата и броевите на улиците и поради тоа решенијата за радиодифузна такса за осми и деветти месец оваа година доцнат, но дека нивното доставување е во тек.

„Доколку се појават недоследности, неточни податоци, задолжување со повеќе решенија за едно семејно домаќинство, за сите исправки граѓаните можат своите барања во врска со решенијата за радиодифузната такса да ги достават по пошта или да се јават телефонски, а скопјани можат и лично на шалтерите на Македонската радио-телевизија“, соопштија од јавниот сервис, од каде што се извинуваат за настанатите пропусти.

На дополнително инсистирање, по и-мејл ни беше одговрено само дека МРТ од носењето на Законот за радиодифузна дејност во 2005 година до денес постојано работи на изготвување и надградба на базата на податоци за физички лица и постојано врши корекции по барање на граѓаните во нивните адресни и лични податоци, промена на имињата и броевите на улиците, промена на местото на живеење на граѓаните, бришење на починати лица и слично.

До Дирекцијата за заштита на лични податоци досега нема пристигнато ниту една претставка од граѓаните за двојните сметки за радиодифузна такса, како и поплака од каде им се на МРТ податоците за членовите на семејството. „Ако некој поднесе претставка, ќе испитаме што навистина се случило. Засега не можеме да кажеме дали има прекршување на некој законски основ, но МРТ како јавен сервис што наплаќа јавна давачка има пристап до одредени податоци за граѓаните“, вели Димитар Георгиевски, прв човек на Дирекцијата.