22.10.2012, 16:33 УЦИ му ги одзеде титулите на Ленс Армстронг
Потврдена и доживотната забрана за настап на 41-годишниот седумкратен победник на Тур де Франс
На Ленс Армстронг му се одземени седумте титули на Тур де Франс и доби доживотна суспензија откако Меѓународната велосипедистичка унија (УЦИ) ги потврди санкциите на Антидопинг агенцијата на САД (УСАДА) против Американецот. Долго очекуваната одлука го соочи велосипедизмот со неговата „најголема криза“ според претседателот на УЦИ, Пет Меквејд, и ја уништи последната надеж на Армстронг да си го исчисти името.
„Ленс Армстронг нема место во велосипедизмот. Ленс Армстронг заслужува да биде заборавен во велосипедизмот“, изјави Меквејд на прес-конференцијата, на која нагласи дека овој спорт, обременет со допинг-проблеми со децении, ќе треба да почне се' од почеток. „УЦИ посакува да тргне напред денеска со потврдата дека нема да се жали до Судот за арбитража во спортот и оти ќе ја признае казната што ја изрече УСАДА. Ми се слоши од тоа што го прочитав во извештајот на УСАДА“.
На 10 октомври УСАДА објави извештај за Армстронг, во кој го обвини сега пензионираниот возач дека бил вмешан во „најсофистицираната, професионализирана и успешна допинг-програма што спортот ја видел кога и да е“. Армстронг (41) претходно избра да не ги оспори обвинувањата од УСАДА, забрзувајќи го нејзиниот предлог за негово казнување зависно од потврдата од УЦИ. Некогашниот колеги на Армстронг во тимовите Ју-Ес постал и Дискавери ченел, каде што тој ги освои своите седум титули на Тур де Франс од 1999 до 2005 година, сведочеа против него и им беа намалени казните од американските власти.
„Не беше така до интервенцијата на федералните агенти. Тие ги повикаа овие возачи, ги ставија своите пиштоли и значки пред нив и им рекоа: ’сега се соочувате со големиот судски совет, на кој морате да му ја кажете вистината‘, по што тие капитулираа“, додаде Меквејд.
Армстронг, со ореолот на еден од најголемите велосипедисти во светот на сите времиња и на борец против ракот што доминираше во овој спорт, постојано негираше дека се допингувал и изјавуваше дека никогаш не паднал на допинг-тест. Тој изјави дека престанал да ги оспорува обвинувањата по долгогодишни гласишта, бидејќи „во животот на секој човек доаѓа момент кога треба да каже: ’Доста е‘“.
Меквејд, кој се соочи со критики од повеќе страни за начинот на кој тој и УЦИ се справија со случајот, изјави дека нема да даде оставка.
„Велосипедизмот има иднина. Не е првпат велосипедизмот да дојде до крстопат и да мора да почне се' отпочеток“, изјави тој во просторијата полна со новинари и со телевизиски камери. „Кога станав претседател во 2005 година, борбата против допингот ја означив како мој приоритет. Ми беше јасно дека во велосипедизмот постои култура на допингување. Велосипедизмот помина долг пат. Немам намера да се повлечам од функцијата претседател на УЦИ. Жал ми е што не го фативме секој проклетник со валкани раце и да го исфрлиме од спортот“.
Други прашања, како можното врачување на титулите на Армстронг од Тур де Франс на друг, како и паричните награди, ќе бидат разгледувани од Менаџерскиот комитет на УЦИ в петок.
Директорот на Тур, Кристијан Придом, смета дека никој од велосипедистите не би требало да ги добие одземените титули, имајќи ја предвид раширеноста на допингот во тоа време, но Меквејд стави до знаење дека одлуката за тоа е во надлежност на УЦИ, а не на организаторот на Тур де Франс.
УСАДА казни петмина вмешани во овој допинг-скандал. Докторите Луис Гарсија дел Морал и Микеле Ферари, како и тренерот Пепе Марти добија доживотни суспензии, а меноторот на Армстронг, Јохан Бринел, реши да оди на арбитража заедно со докторот Педро Селаја.
|
