22.10.2012, 14:53 Повисоки цени за еуросупер 98 и дизелот
Цената на еуросуперот БС-98 се зголемува за половина денар по литар, а на дизелот и на екстра-лесното масло за домаќинство за 2, односно 2,5 денари
Регулаторната комисија за енергетика денеска одлучи цената на еуросупер 98 да се зголеми за 0,5 денари, односно на 85 денари за литар. Дизелот пак поскапува за 2 денари, така што ќе чини 73,5 денари за литар, а поскапува и екстра-лесното масло за домаќинство, чија цена се зголемува за 2,5 денари за литар. Непроменета останува цената на еуросупер 95. Единствено се намалува цената на мазутот.
Инаку, грчките медиуми денеска пишуваа дека одлуките на македонски власти да и' ги одземат одобренијата за поедноставна царинска постапка и увоз на нафта и нафтени деривати на „Окта“, ќе ја зголемат цената на горивата во Македонија. Грчкиот портал за енергетски прашања „енерџи.гр“ тврди дека сега единствена алтернатива за Македонија е да увезува гориво од рафинеријата во Бургас, која е дел од „Лукоил“, но тоа е многу поскапа варијанта поради скапите трошоци за транспорт. Министерот за финансии Зоран Ставрески минатата недела изјави дека не очекува да дојде до криза во снабдувањето со нафта во Македонија. (Ек.Р.)
|
