22.10.2012, 14:40 Месото мора да има декларација
Сите продажни објекти и кланици во Македонија се обврзани да продаваат свежо, разладено и смрзнато месо со декларација на која точно ќе бидат назначени земјата на потекло, рокот на траење, нето-тежината, местото на обработка и условите на складирање.
Од Агенцијата за храна и ветеринарство денеска информираа дека оваа обврска е според Правилникот за соодветно декларирање и обележување на месото, донесен кон крајот на минатата година.
„Оставивме доволно простор и време за приспособување на фирмите. Од оваа недела веќе се во тек интензивни контроли. Дел од нив покажаа неправилности, но засега нема да бидат санкционирани“, велат во Агенцијата. Правилникот налага соодветна декларација, доколку месото е увезено, да пишува каде е родено, одгледано и заклано животното, неговата старост, да биде назначен кодот на земјата од каде што доаѓа, како и бројот на кланицата. (Ек. Р.)
|
