22.10.2012, 15:38 По шест години, Рубинчо Заревски осуден на условна казна
Поранешниот директор на Фондот за здравство, Рубинчо Заревски е осуден на условна казна, по повеќе од шест години од денот кога беше приведен во Скопје. Скопскиот кривичен суд за злоупотреба на службената положба и овластување, на Заревски му изрече казна затвор во траење од две години, која се заменува за условна казна доколку во наредните пет години не стори ново кривично дело. На идентична казна судот го осуди и претседателот на Комисијата за јавни набавки, а членовите на комисијата се осудени на по една година затвор кој се заменува за условен за три години.
Апсењето на екс-директорот на ФЗОМ се случи во декември 2006 година. Тој беше осомничен дека во 2003 година, со своето постапување го оштетил буџетот за 1,6 милиони денари со тоа што наводно не го избрал најповолниот понудувач на тендерот за набавка на потрошен медицински материјал.
Заревски се спаси од притвор, откако неговиот адвокат Александар Тортевски гарантираше пред судот дека неговиот штитеник нема намера да побегне и дека не може да го повтори делото, со оглед на тоа што во тоа време ја вршеше функцијата директор на „Т-Мобиле“. Десетина месеци подоцна кон предметот на Заревски беа приклучени и членовите на Комисијата за набавки. (Љ.С.)
|
