Борло формира нов политички блок во Франција

Поранешниот француски министер за екологија и енергетика во Владата на Никола Саркози, Жан-Луј Борло синоќа во Париз промовираше нова политичка партија - Унија на демократите и независните (УДИ), која има амбициозна цел да стане најголема политичка сила во Франција пред Социјалистичката партија и конзервативната Унија на народното движење (УМП).

Во УДИ, кон која пристапија околу 60 пратеници и сенатори, се обединија седум помали партии од десниот центар, меѓу кои и Радикалната партија, чиј досегашен претседател беше Борло, како и Модерна левица на градоначалникот на Мулуз и поранешен министер Жан-Мари Бокел. Кон УДИ пристапи и партијата Нов центар на поранешниот министер за одбрана Ерве Моран, но не и Демократското движење (Модем) на Франсоа Бајру.

Борло пред околу 4.000 симпатизери порача дека УДИ, која сака да биде наследничка на силниот политички центар на Франција од седумдесетите години на минатиот век, е „вистинската надеж“ за земјата.

Политичкиот центар за време на вториот мандат на Жак Ширак и посебно за време на мандатот на Никола Саркози, целосно беше апсорбиран од УМП. Но, реториката на Саркози и на некои лидери од УМП, која стана многу блиска со онаа на екстремно десничарскиот Национален фронт, доведоа до раѓање на оваа нова политичка партија.

УДИ ја доби поддршката од поранешниот претседател на Франција Валери Жискар д’Естен и Симон Вејл, поранешна министерка за здравство. Амбиција на партија е победа на претседателските избори во Франција во 2017 година, а нејзин прв тест ќе бидат локалните и регионалните избори закажани за 2014 година.