Трета рунда меѓу Обама и Ромни

Претседателските кандидати денеска ќе се „пресметаат“ на третата и последна предизборна дебата во која влегуваат со изедначени шанси

Американскиот претседател Барак Обама и кандидат на Демократската партија за претседателските избори и републиканецот Мит Ромни се подготвуваат за третата и последна дебата, која е последната можност за директно соочување пред милионскиот телевизиски аудиториум во момент кога анкетите покажуваат дека тие имаат речиси еднаква поддршка од гласачите.

Деведесет минутната дебата ќе се одржи денеска на Универзитетот во Бока Ратон, во сојузната држава Флорида ��о 21 часот по локално време и ќе биде посветена на надворешната политика. Модераторот Боб Шифер од телевизијата Си-Би-Ес најави пет теми за кои треба да се произнесат претседателските кандидати, при што најмногу време е предвидено за случувањата на Блискиот Исток и тероризмот.

Обама и Ромни ќе треба да ги изнесат своите ставови во однос на следните теми: „Улогата на САД во светот“, „Најдолгата војна на САД - Авганистан и Пакистан“, „Црвените линии - Израел и Иран“, „Изменетиот Блиски Исток и новото лице на тероризмот“ и „Прогресот на Кина и утрешниот свет“.

Аналитичарите забележуваат дека не се опфатени повеќе важни теми како финансиската криза во еврозоната и односите на САД со Русија, но доколку сакаат Обама и Ромни можат да се осврнат и на други теми, кои не се содржани на листата прашања за дискусија.

Иако водечката тема на овие избори е економијата, надворешната политика го привлече медиумското внимание по нападот од 11 септември врз Конзулатот на САД во либискиот град Бенгази, во кој беа убиени четворица Американци, меѓу кои и американскиот амбасадор Кристофер Стивенс.