19.10.2012, 16:35 Го сменил името, но не се спасил од убиство
КУМАНОВО - Полицијата трага по убијците на Ендрит Љатифи (31) од кумановско Опае, кој вчера попладне беше застрелан на улицата „11 Октомври“ во Куманово. Злосторството, како што соопшти полицијата, се случи околу 16,50 часот додека Љатифи се движел со „форд ескорт“. Бил следен од „голф“, во која биле четири непознати лица, кои со возилото удриле во неговиот „форд“. Тој излегол од автомобилот, почнал да бега кон Итната помош, обидувајќи се да се спаси од напаѓачите, кои пукале кон него. Го погодиле со неколку куршуми. Бил пренесен во Медицинскиот центар во Куманово, но лекарите единствено можеле да констатираат смрт. Опаецот бил застрелан со осум куршуми во градите и во стомакот.
„Контактиравме со семејството, се согласија само да се направи обдукција. Никакви други информации не ми дадоа, дали порано имал нешто со напаѓачите - се' уште немам такви сознанија. Во текот на истрагата ќе се утврди“, изјави за медиумите, Муса Сулејмани, истражен судија во кумановскиот Основен суд.
Низ чаршијата кружат шпекулациии дека станува збор за крвна одмазда. Љатифи пред неколку години го сменил името и презимето (Гзим Османи н.з.). Никогаш не бил пријавуван во полиција, но постојано бил жртва во разни напади. „Се зборува се' и сешто, дека се криел од крвна одмазда, дека убијците се од Арачиново, но не знам дали има вистина во тоа. Јас само знам дека три деца ќе плачат по него, што ќе прават сега без татко“, велат жители на Опае. (Г.А.)
|
