Спорот за името ги влошува внатрешните односи во Македонија

Професор од универзитетот Бафало, Василики Неофотистос, смета дека спорот за името треба да се реши, бидејќи предизвикува тензии во македонското општество

Спорот за името треба да се реши, бидејќи предизвикува тензии во македонското општество, но големо прашање е дали грчката Влада сега може да се посвети на тоа, изјави Василики Неофотистос, професор од универзитетот Бафало во САД, на вчерашното предавање за Македонија.

- Не знам дали ќе има решение на спорот за името. Се надевам дека тоа ќе се реши, бидејќи фактот што нема согласност околу ��мето предизвикува прилично несигурност и тензии во Македонија, вклучително и меѓу Македонците и Албанците. Спорот ги влошува нивните односи, поради изјавите на Албанците дека всушност сакаат да бидат во ЕУ независно од името, додека Македонците се многу помалку подготвени на компромис околу името. Но, важно е да се има предвид и економската криза во Грција. Прашање е дали грчката Влада ќе биде подготвена да го реши спорот сега, изјави Неофотистос.

Таа е автор на книгата „Ризик од војна“, посветена на нејзините истражувања спроведени во Македонија во текот на 2001 година. Неофотистос, која е професор на катедрата по антропологија во Бафало, своето предавање во центарот „Вудро Вилсон“ во Вашингтон го посвети на односите меѓу Македонците и Албанците и Охридскиот рамковен договор.

- Македонците сметаат дека загубиле со амандманите на Уставот, додека кај Албанците е широко прифатено сфаќањето дека тие добиле со спроведувањето на Охридскиот рамковен договор. Многу во албанската заедница сметаат дека договорот требало да се спроведе многу порано, и се уште бараат од Владата да преземе повеќе чекори за негово спроведување. Има доста дискусии околу значењето на договорот и како треба да се спроведе, но мислам дека едно може да се каже со сигурност, дека договорот ги консолидираше меѓуетничките разлики, но на сметка на помалите етнички заедници во Македонија, изјави Неофотистос.

Американската професорка, како што јави дописникот на МИА од Вашнгтон, се осврна на точките на поврзување на граѓаните во Македонија, кои ги идентификуваше во заедничкото стремење кон вредностите на Западна Европа, но и кон етнички поделените училишта, и случаите на насилство како убиствата кај Смиљковци и Гостивар. Неофотистос оцени дека македонските граѓани успеале да се изборат со економските и политичките тешкотии, и да најдат начин да продолжат да се развиваат.