„Шишеџам“ пишман за пишманењето

Конечниот одговор од турската компанија се очекува во почетокот на 2011 година

Маја Томиќ

Дали „Шишеџам“ наскоро ќе стане трета инвестиција во зоната „Бунарџик“? Вицепремиерот за економски прашања, Владимир Пешевски, вчера најави дека конечниот одговор од турската компанија за реализација на веќе најавената инвестиција, изградба на фабрика за стакло, може да се очекува во првиот квартал од следната година.

Преговорите со Владата биле прекинати поради економската криза, а сега се обновени, посочи Пешевски, кој изрази оптимизам дека инвестицијата ќе заврши со успех.

„Во светло на последните случувања во светот и новата стратегија што ја имплементира компанијата, повторно ги почнуваме разговорите. Јас сум оптимист дека тој процес ќе заврши успешно, но станува збор за голема инвестициска одлука од компанијата. Работиме активно и очекувам во првиот квартал од следната година да го добиеме конечниот одговор, дали ќе инвестираат или не“, изјави вчера Пешевски по конференцијата за унапредување на извозот.

Меморандумот за разбирање меѓу Владата и „Шишеџам“, четврта по големина компанија за стакло и стаклени производи во светот, беше потпишан пред една и пол година, непосредно пред локалните и претседателските избори. Според него, фирмата годинава требаше да почне со изградба на фабрика за производство на шишиња за пиво и за сокови. Првично најавената инвестиција изнесуваше 45 милиони евра, за првата фаза, а нудеше вработување на околу 300 лица. Годишното производство требаше да достигне вредност од 45 милиони евра.

Владата отсекогаш беше оптимист кога стануваше збор за турските инвестиции. За потсетување, во мај годинава премиерот Никола Груевски на македонско-турскиот бизнис-форум во Охрид изјави дека од Турција треба да пристигнат инвестиции од половина милијарда долари, вклучувајќи ги ТАВ и „Шишеџам“.

„Од Турција очекуваме дека сегашните 180 милиони долари инвестиции, до 2011 година ќе достигнат половина милијарда долари“, оцени тогаш Груевски.

А, освен „Шишеџам“, во изминатиов период беше искажан и интерес за инвестирање и од страна на турските „Борал“ и „Чимса“, производител на цемент. На последниот македонско-турски форум, организиран од Стопанската комора, беше кажано дека „Чимса“ би инвестирала околу 200 милиони евра на нашиот пазар.

Владата досега имаше многу бизнис-средби, дома и надвор, а резултатите од конкретните инвестиции се мали. Од најавените вложувања во зоната „Бунарџик“, меѓу кои од словенечка „Искра“, италијанската „Техно хосе“, турската „Отомотив“, корејската „Хаиер“, француската „Монтипе“, засега работат само „Џонсон контролс“ и „Џонсон Мети“.