Претходен број

Шакири против Шпанија ќе се прости од репрезентацијата

„Убиецот“ на Симан за Македонија одигра 72 меча и постигна 15 гола, со кои е втор стрелец

Миодраг Мицковиќ

Еден од нашите најдобри фудбалери Артим Шакири за последен пат ќе го облече дресот на репрезентацијата на Македонија на пријателската средба со Шпанија што ќе се одигра во Скопје на 12 август по повод 100-годишнината на фудбалот во нашата држава. Тоа ќе биде негово простување од репрезентативниот дрес на нашата најдобра селекција по 72 настапи и неговите 15 гола.

Артим Шакири дебитираше за „А“ селекцијата на Македонија на пријателската средба со Бугарија 1996 година, кога Македонија беше поразена со 3:0 во Софија, последен меч одигра во Скопје против Русија (0:2) во квалифиакциите за Европското првенство.

Во својата богата и успешна фудбалска кариера Артим Шакири има играно за 16 клуба во 11 држави што е совевиден рекорд во македонскиот фудбал. По него на таа листа фудбалери кои играле за најмногу клубови е битолчанецот Ѓорѓи Христов кој настапил за 13 клуба во седум држави.

Кариерата Артим Шакири ја започна во малиот клуб Динамо од селото Ливада кај Струга, а потоа во Македонија играше за Караорман, Вардар и малку во Шкендија од Тетово.

Во странство Артим Шакири го има носено дресот на Хамштат (Шведска), Тенис Борусија (Германија), Хит Горица и Коротан (Словенија), Малатија Спорт (Турција) ЦСКА Софија (Бугарија), Вест Бронвич Албион (Англија), Алборг (Данска), Интер Турку (Финска), Фадус (Лихтенштајн), Беса (Албанија), а последниот клуб за кој настапуваше беше победникот на Купот на Азербејџан, Карабах.

Во моментов Шахири е слободен играч, но веќе донесе одлука да се збогува со активното играње и да се посвети на тренерскиот позив за што веќе од сега има неколку понуди со оглед на неговата блескава кариера.

Од 15 голови што ги има постигнато за репрезентацијата на Македонија, Артим Шакири, се' уште е во сеќавање оној прекрасен гол што го постигна на мечот со Англија (2:2) во Саутемптон директно од корнер совладувајќи го англискиот голман Дејвид Симан. Овој гол долго се вртеше на сите телевизиски спортски екрани во Европа.