Интерпелација за Ставрески, за дуел ќе почека

СДСМ бара одговорност од министерот за финансии, а ВМРО-ДПМНЕ нуди ТВ-соочување со него

Ќе има ли ТВ-дуел Црвенковски - Ставрески. Опозицискиот лидер би ја прифатил ракавицата што му ја фрли ВМРО-ДПМНЕ, но само ако актуелниот министер за финансии и член на Извршниот комитет на владејачката партија се подготвувал да го замени Никола Груевски на лидерската позиција во партијата. Така одговорија од СДСМ откако Антонио Милошоски го предизвика Црвенковски на дуел со Ставрески, а како одговор на барањето на опозицијата министерот за финансии да замине од Владата.

Ставрески, сепак, ќе мора да се соочи во парламентот со опозициските пратеници откако Црвенковски соопшти дека за министерот за финансии ќе биде поднесена интерпелација. Во екот на кадровските смени што ги презема ВМРО-ДПМНЕ, СДСМ процени дека треба да се преиспита работата на Ставрески, еден од најблиските соработници на премиерот Груевски. Интерпелацијата се поведува поради тоа што по само четири месеци се прави ребаланс на буџетот, како и поради континуирано енормно задолжување на државата, но и поради инволвираност на Царината и на УЈП во аферата „Детонатор“.

Од ВМРО-ДПМНЕ одговорија дека ребалансот се прави поради кризата во ЕУ и нејзиното влијание врз нашата земја. Од владејачката партија му понудија на Црвенковски телевизиско соочување со Ставрески.

„Најдобро е, ако Црвенковски се чувствува подготвен, да излезе на ТВ-дебата со министерот Ставрески, да дебатираат за буџетот и за економијата“, предложи Милошески.

Ова е прв пат оваа гарнитура на врвот на ВМРО-ДПМНЕ да предлага дуел со опозициски претставник, но не на ниво на партиски лидери, туку меѓу водачот на СДСМ и министерот за финансии. Оттаму и одговорот од опозицијата дека Црвенковски би дебатирал со Ставрески ако тој е кандидат да го замени Груевски во партијата.

Повеќето изборни кампањи во втората деценија од плурализмот во Македонија поминаа без телевизиско соочување меѓу лидерите на двете најголеми партии, иако овој сегмент од кампањата е вообичаена практика во повеќето демократски општества. И на предвремените избори во 2008 и на последните избори минатата година, Груевски ја одби понудата што му ја упати јавно опозицијата за дуел со кандидатката на СДСМ за премиер, Радмила Шекеринска. Досега немало телевизиско соочување на Груевски ниту со Црвенковски, иако тој веќе трета година повторно е на кормилото на СДСМ. Со образложение дека Владата дава отчет пред граѓаните, премиерот не се соочи ниту со Зоран Заев за време на локалните и претседателските избори во 2009 година, ниту со Владо Бучковски во 2006, кога ВМРО-ДПМНЕ беше во опозиција. (А.М.М.)