13.10.2011, 21:59 Отфрлена тужбата за силување против Строс-Кан
Јавното обвинителство на Париз ја отфрли тужбата за обид за силување на Тристан Банон против Доминик Строс Кан, оценувајќи дека сепак некои акти можат да бидат квалификувани како „сексуален напад“, но тие веќе се застарени дела.
Младата новинарка и писател уште пред соопштувањето на одлуката на јавното обвинителство, најави дека веднаш ќе поднесе тужба во граѓанска постапка, со што веднаш ќе треба да биде нзаначен судија за инструкција на предметот.
Во соопштението на јавното обвинителство, меѓу другото се вели дека „поради отсуство на доволно докази, не може да се отвори кривична постапка против Доминик Строс-Кан за обид за силување, неговите акти можат да бидат квалификувани како сексуален напад.
Со оглед дека делото било сторено во 2003 година и беше откриено во јули 2011 година, овие дела се застарени, што е во согласност со законската регулатива во оваа област.“ За време на сослушувањето од полицијата, поранешниот директор на ММФ призна дека и дал „предлози“ на младата жена, ова според еден извор близок на истрагата. Строс-Кан од почетокот се бранеше дека не постапил насилнички кон Тристан Банон за време на средбата во неговиот апартман во Париз.
Одлуката да не се отвора кривична постапка против Строс-Кан, се случи на денот кога излезе во продажба книгата на Тристан банон „Бал на хипокритите“ – книга на автофикција во која таа ја дава својата верзија на настанот, без да го спомене името на Доминик Строс-Кан.
Против поранешниот француски министер и поранешен директор на ММФ се води судска граѓанска постапка во САД, покрената од вработената во хотелот „Софител“ во Њујорк, која го обвинува дека ја силувал. Обвинителот на Њујорк се откажа од кривичното гонење на Строс-Кан, откако оцени дека жртвата не била доволно кредибилна.
|
