14.10.2011, 12:54 Мики Манојловиќ добитник на „Златна камера 300” на „Браќа Манаки“
Српскиот актер Предраг Мики Манојловиќ е добитник на специјалната награда „Златна камера 300” за особен придонес во светската филмска уметност на 32. издание на „Браќа Манаки“, објавија денеска во Битола организаторите на фестивалот.
Мики Манојловиќ е еден од најискусните и најангажирани актери од Србија и поранешна Југославија, со филмографија од речиси сто наслови во различни категории и добитник на низа високи награди и признанија.
Сите национални кинематографии на Балканот се обележани од неговите богати актерски перформанси. Покрај српски, на филм говорел и македонски (Како лош сон), албански (Беса), бугарски (Светот е голем а спасението демне отсекаде), хрватски (Нека остане меѓу нас), ромски (Џипси меџик). Манојловиќ е омилениот лик на најголемите режисерски брендови од регионот, Кустурица, Грлиќ, Карановиќ, Паскаљевиќ, Бајиќ, Тановиќ, помладите Матаниќ, Драгојевиќ, Кољевиќ и нашите Попов и Митриќески.
По распадот на Југославија почнува и неговата интензивна кариера на меѓународен план, играјќи во огромен број француски и италијански наслови. Се одвојуваат впечатливите и забележани улоги во Ослободи ме (1998) на Леа Пул, Криминални љубовници (1999) на Франсоа Озон, Земи ме (2000) на Ариет Мари, Смртен трансфер (2001) на Жан Жак Бене, филмот за стрип јунакот Ларго Винч (2008) на Жером Сале, хит-комедијата Ирина Палм (2009) на Сем Гарбарски. Има глумено покрај сите најголеми имиња од поранешните југословенски простори, но и покрај Емануел Беар, Одри Тату, Чулпан Кхаматова, Винсент Перес, Мишел Сера, Валерија Бруни Тедески, Мариен Феитфул, а во Битола пристигнува од сетот на Бурманска завера, филм во кој главната улога ја толкува Шерон Стоун.
Генерации гледачи ќе го паметат и по улогите во популарните серии Отпишаните и Бос по трње (Грлом у јагоде), незаборавниот лик на Мики Рубироза. Светски познатиот театарски режисер Питер Брук во 1987 година доаѓа во Југославија специјално да го сретне со него.
Во чест на Мики Манојловиќ, на 21 октомври на церемонијата на свечено затворање на Фестивалот ќе биде прикажан контроверзниот филм Беса. Освен Манојловиќ, на затворањето ќе присуствува и режисерот Срѓан Карановиќ, култен автор на просторите на екс-Југославија кој го потпишува овој филм.
|
