Цела недела дизајн во Скопје



Од денеска до 2 октомври во Куршумли-ан ќе се одржи првото издание на манифестацијата „Недела на дизајн“, која ќе понуди многубројни изложби, работилници, предавања и презентации.

Вечерва почнува првото издание на манифестацијата „Недела на дизајн“, која до 2 октомври ќе се одржува во прекрасниот амбиент на Куршумли ан. Овој културен простор повторно ќе заживее во духот на својата оригинална намена и ќе биде домаќин на трговците - овој пат на оние со најбараната стока на 21 век, информациите и идеите. Отворањето е закажана за вечерва во 20 часот, на што му претходи работилницата „Декор“ во 16 часот.

Централниот простор на Анот, како и 47-те ќелии на првиот и вториот кат, пет дена ќе бидат најактивното место во градот, средиште на бројни изложби, работилници, предавања и презентации, дискусии и формулирање на нови идеи и партнерства. На манифестацијата предвидени се и промоции и дегустации на нови производи, а во вечерните часови ќе има и квалитетна музичка програма.

Организатор на „Недела на дизајн“ е платформата Министерство за задоволство, отворена меѓународна структура која ги поврзува оние за кои бизнисот е задоволство, а задоволството бизнис. Во мо��ентов, во платформата се невладините проекти „Паблик Рум“ и „Парк, Плакарт“, како и претставникот на бизнис секторот, „Полиплан“.

„Skopje Design Week“, велат организаторите, ќе го претстави најдоброто од македонскиот дизајн, особено свежата крв. Голем акцент е ставен на соработката со факултетите за индустриски дизајн и мода и вклучување на студентите во процес на работа за конкретни клиенти и пазари. Во Куршумли ан, во деновите на фестивалот, ќе се одвиваат неколку такви работилници, а ќе бидат организирани и неколку практични презентации што ќе ги воведат младите дизајнери во градењето сопствен бренд, негов идентитет, следењето или диктирањето трендови на пазарот. Организаторите велат дека за професорите од креативните факултети, а и за креативата на маркетинг агенциите од особен интерес ќе биде предавањето/работилницата „Креативна стратегија“ водена од Академијата за дизајн од Ајндховен, а која ќе се одржи во петок во 14 часот, како и дебатата „Креативноста во Македонија“ закажана за в сабота.

Програмата на „Недела на дизајн“ вклучува и музичка програма, настапи на музички групи и диџеи. (Т.И.)