Фестивал на занаетчиите во Старата скопска чаршија



Со отворање на Фестивалот на занаетчиите во Старата скопска чаршија денеска и официјално почна манифестацијата „Денови на занаетчиството во Македонија 2011“ што годинава се одржува под мотото „Биди занаетчија, биди перспективен“

Фестивалот за отворен го прогласи министерот за економија Ваљон Сарачини, кој како дел од проектот „Признанија за најуспешните“ синоќа му додели и плакета за заслуга за развој на занаетчиството во Македонија на Енвер Абди, златар од Скопје и претседател на Собранието на Занаетчиската комора со што манифестацијата беше прогласена за отворна.

- Деновите на занаетчиство се вистинска можност за поттик, промоција и ревитализација на занаетчиството во Македонија. Занаетчиството е важен фактор на економскиот развој и како стопанска дејност има огромен, но за жал недоволно искористен потенцијал. Затоа сите заеднички треба да работиме оваа манифестација да стане традиционална и препознатлива во државата, но и пошироко, рече министерот Сарачини во поздравниот говор.

Тој посочи дека деновиве Старата скопска чаршија треба да биде место на дружење, средби, разговори и договори и да привлечат нови сили - нови ученици кои ќе ги изучуваат занаетите, а мајсторите да почнат нови бизниси. Потсети на минатото кога во чаршијата се создавале, како што рече, братски односи и не било битно кој како се вика и повика повторно тоа да се врати на сцена.

- Тоа ќе биде гарант за иднината на занаетчиството и на стопанството. Затоа Владата изготви Стратегија за развој на занаетчиството со акциски план од 2012 до 2020 година, рече министерот Сарачини и потсети дека Владата и досега направила напори за поддршка на занаетчиството преку воведувањето на регулаторната гилотина, образованието и обуките за занаетчиството и доделување грантови од 5.000 евра за набавка на алат и опрема, како и за стручно образование.

Во тек на „Денови на занаетчиството во Република Македонија 2011“ низ девет градови во државата ќе бидат организирани дискусии на теми од важност за занаетчиството, стручни семинари и обуки, работилници, базар на ракотворби, а ќе биде прогласен и занаетчија на годината. Целта е да се промовираат можностите и разноликоста од услуги и производи шти ги нудат занаетчиството и занаетите, да се зачуваат традицијата и културата, а притоа да се срушат табуата и предрасудите за занаетчиството како стар и неисплатлив занает.

Манифестацијата „Денови на занаетчиството во Македонија“ се одржа првпат лани во септември во организација на Занаетчиската комора, а со поддршка од Занаетчиската комора Кобленц од Сојузна Република Германија и Министерството за економија на Македонија.