Ларс Фон Трир повеќе нема да зборува јавно



Контроверзниот дански филмски режисер Фон Трир ова го соопшти вчера откако скандалот што во мај годинава го направи на Канскиот филмски фестивал сега стана полициски предмет.

Одлуката на данскиот режисер со големо меѓународно реноме е поврзана со неодамнешното сослушување на кое бил повикан кај данската полција. Сослушувањето се случило на барање на француско јавно обвинителство, кое сака да испита дали Фон Трир го прекршил францускиот закон. Тој е осомничен дека ги величал воените злосторства, пишува данскиот весник „Политикен“.

Ларс Фон Трир на една прес-конференција во Кан рече дека го разбира Хитлер, по што беше прогласен за „персона нон грата“.

Според мислењето на критичарите, последниот филм на Трир "Меланхолија" бил сериозна конкуренција на Маликовиот "Дрво на животот" за златната палма во Кан, но после скандалот, Американецот ја доби посакуваната награда, а данскиот режисер беше прогласен за непожелна личност.

- Кажав идиотски работи и жал ми е што повредив многу луѓе. Мојот проблем е во тоа што мразам конфликти, па не можам да се натерам да не ги предизвикувам. Кога стојам пред публика која очекува нешто да кажам, јас тоа и го правам. А кога ќе кажам дека сум нацист, потполно сум шокиран кога луѓето ќе поверуваат во тоа. Во Кан допрев табу, а тоа предизвика жестоки реакции – рече Фон Трир по скандалот во Кан, потсетувајќи дека „десет пати се извинил“.

Во своето вчерашно соопштение Фон Трир пишува дека сега „бил принуден да увиди оти не располага со способност да се изразува недвосмислено“.

- Затоа решив, почнувајќи од денеска, да се воздржам од секаков вид јавно изразување и исклучиво да се посветам на работата на моите филмови, потенцира Фон Трир.