14.10.2011, 11:39 Собранието ја продолжува расправата за прекин на пописот
Со законот, поднесен од Владата на Република Македонија, се предлага престанување на важноста на Законот за попис, со што и официјално пописот е прекинат.
Собранието на Република Македонија денеска ќе ја продолжи дванаесетата седница на која како единствена точка на дневниот ред е Предлог-законот за престанување на важење на Законот за попис на населението, домаќинствата и становите, по скратена постапка.
Со законот, поднесен од Владата на Република Македонија, се предлага престанување на важноста на Законот за попис, со што и официјално пописот е прекинат.
Министерот за правда Блерим Беџети вчера, образложувајќи ја одлуката на Владата, рече дека причините за донесување на законот се недоследности и недоречености во примената од одредби од Законот за попис како резултат на недоволен временски период за подготовка и обучување на учесниците во спроведување на пописот во земјата, а посебно на реонските инструктори и попишувачи. Беџети објасни дека со предложениот закон, пописниот материјал собран за време на спроведувањето на пописот, Државниот завод за статистика ќе го уништи согласно на прописите за класифицирани информации, а нап��авените трошоци во врска со спроведувањето во сила на Законот за попис ќе се исплатат од Државниот завод за статистика, кој, пак, во рок од три месеци од влегувањето во сила на овој закон треба да поднесе извештај до Владата.
Пратениците од ДПА ја напуштија седницата и нема да учествуваат во работата на Парламентот по оваа точка на дневен ред поради тоа што не бил отворен поширок политички дијалог за процесот на пописот, неодржувањето средба на лидерите на најголемите политички партии во Македонија и поради фактот дека парламентарното мнозинство не одржало претходни консултации за законот што е на дневен ред.
Пописот на населението, домаќинствата и становите почна на 1 октомври, а беше прекинат откако членовите на Државната пописна комисија поднесоа оставки поради недоследна примена на Законот за попис.
Пописот требаше да се одржи од 1 до 15 април годинава, но беше одложен поради изборите и презакажан за терминот од 1 до 15 октомври.
Предлог-законот за престанување на важење на Законот за попис на населението, домаќинствата и становите денеска ќе биде разгледан и на седница на Законодавно-правната комисија.
|
