Сакал - не сакал, Јакимовски ќе треба да се бори за Скопје?

Иако неодамна изјави дека повеќе сака да се бори за трет мандат во Карпош, Стевче Јакимовски доминира во партиските анализи и анкети за главниот град

Наум Котевски



Малку повеќе од еден месец до главниот митинг на плоштадот во Скопје (најавен е за 28 октомври), опозицијата никако конечно да одлучи кој ќе му се спротивстави на актуелниот градоначалник на престолнината, Коце Трајановски, на локалните избори наредната година. Несигурност или тактизирање?

Доколку го побарате одговорот во СДСМ, како официјален партиски став, срамежливо ќе ви кажат дека во игра се неколку кандидати, но дека се' уште траат внатрепартиските анализи и анкети, кои треба да бидат барабанот што ќе го исфрли името со редниот број на најдобриот кандидат. Нема потреба од брзање, не смее да се погреши, по два пораза во главниот град, време е за победа, ќе ви додадат социјалдемократите.

Но, нашите информации велат дека актуелниот градоначалник на Карпош, Стевче Јакимовски, најверојатно, ќе биде џокерот на СДСМ за главниот град. Тој во своето интервју за „Утрински весник“ рече дека неговата намера е да добие уште еден мандат со цел да ги заврши сите започнати проекти во Карпош и да ја направи оваа скопска општина најпривлечно и најсредено место за живеење. Сепак, додаде дека краен збор ќе има централата. Токму таа, според наши извори, е многу блиску гордо да извика: „Јакимовски ќе ја стави паричката во џубоксот и ќе ја смени песната цело Скопје - вмровски град“.

Внатрепартиските анализи, наводно, веќе се завршени и, според нив, Јакимовски не само што има предност во однос на своите партиски конкуренти туку води и во компаративните методи со директниот конкурент Коце Трајановски.

Ваквиот евентуален епилог можеби нема да му се допадне на Јакимовски, бидејќи е јасно дека борбата со Трајановски ќе биде ризична и исцрпувачка, но функционери на СДСМ сметаат дека токму тој треба да го прифати предизвикот, како претседател на скопската организација на СДСМ.

Покрај Јакимовски, кој сакал - нејќел ќе мора да ја послуша одлуката на раководството, во медиумите од поодамна се шпекулира и со имињата на Гордан Георгиев, Андреј Петров, Радмила Шеќеринска, а во последно време се споменува и Софија Куновска, која е еден од најгласните советници на СДСМ во Советот на град Скопје. Првите тројца уште пред еден месец за „Утрински весник“ негираа дека се кандидати да управуваат со главниот град.

Најсигурна во своето демантирање изгледаше Шекеринска, која неодамна во Собранието кажа дека Скопје е жртва и пациент на најлошите пластични хирурзи кои претеруваат со фејс-лифтингот.

„Тоа се гласишта и шпекулации. Затоа и нема да ги коментирам за да не ги засилам, бидејќи обично тоа е резултат на коментарите и на демантите“, рече Шекеринска.

Инаку, СДСМ, кој полека го завршува проектот „Работно лето“, а патем најави и кампања од врата на врата, веќе излезе со неколку официјални кандидати за градоначалници. Во трката за Струмица ќе учествува Зоран Заев, во онаа во Велес Аце Коцевски, во Неготино - Силвана Филипова, во Охрид - Александар Петрески, во Штип - Здравко Коцев, во Велес - Аце Коцевски, во Прилеп - Хари Локвенец, во Куманово - Зоран Дамјановски, во Крива Паланка - Горан Младеновски, во Богданци - Зоран Прочков, во Битола - Менде Диневски, во Кавадарци - Борче Ставров...

Во Тетово, Гостивар, Чаир, Сарај, Студеничани и во Липково, СДСМ, најверојатно, ќе го поддржи кандидатот на ДПА, со оглед на фактот дека албанското население е доминантно и не може да победи кандидат од македонска партија.

Разговорите меѓу СДСМ и ЛДП за тоа кој да биде кандидат за Општина Центар се' уште траат. ЛДП е на мислење дека претставник на здружената опозиција треба да биде претседателот на партијата, Андреј Жерновски, кој како конкурент го има Дамјан Манчевски.