Контроли за безбедноста на работните места

Дванаесет правни субјекти вчера добија овластувања за вршење стручни работи за безбедност при работа од министерот за труд и социјална политика, Џељаљ Бајрами, односно за процена на ризикот на работните места. „Согласно со Законот за безбедност и здравје при работа, субјектите што се стекнаа со дозволи за работа ќе го проценуваат ризикот при вршење на работа во компаниите. Процената ќе се прави по работно место, а не по работник. Исто така, периодично ќе се врши мерење на физички, хемиски и биолошки штетности“, истакна министерот Бајрами, но не прецизира колку ќе чини секоја процена, бидејќи, како што рече, тоа ќе го утврдуваат правните субјекти што добиле лиценци.

„Затоа чекавме да се пријават повеќе правни субјекти за да не дојде до тоа ако се во помал број да формираат повисоки цени за процена, кои не би можеле да ги издржат компаниите“, додаде министерот. Тој информира дека барање за дозвола поднеле 13 правни субјекти, од кои 12 ги исполнувале условите. Во меѓувреме, од 2009 година се спроведува обука што ја поминале околу 300 лица. Казните за неизвршена процена се од пет до осум илјади евра.

„Ние, односно Трудовиот инспекторат, нема да изрекува мерки веднаш, туку ќе ги потсетуваме дека тоа е обврска што треба да се исполни. Доколку и по дадените задолженија обврските не се исполнат, ние ќе бидеме принудени да изрекуваме казни“, појасни Бајрами. Директорот на Државниот трудов инспекторат, Горан Јовановски, рече оти најпрво задолженија за извршување процена на ризик ќе се даваат онаму каде што тој е најголем, односно во градежништвото и во производствениот сектор.

Од Здружението за заштита и безбедност при работа истакнуваат дека процесот на процена на ризик е значаен и е од корист и на работниците и на работодавците. (Ек.Р.)