Бензините поевтинија за половина денар

Бензините од денеска поевтинуваат, а непроменети остануваат цените на еуродизелот и на екстра лесното масло за домаќинството, одлучи вчера Регулаторната комисија за енергетика. Според одлуката, „Еуросупер БЦ- 95“ поевтинува за половина денар и ќе се продава по 67,50 денари за литар, а цената на „Еуросупер БЦ – 98“ се намалува за денар, со што еден литар ќе се плаќа 69 денари. „Еуродизел“ (Д-4), како и во изминатите две недели ќе се продава за 57,5 денари за литар, а екстра лесното масло за домаќинство (ЕЛ-1) за 46 денари.

Се намалува малопродажната цена на мазутот М-1 НС за 0,551 денари за килограм и неговата нова цена е 31,700 денари. Малопродажните цени на нафтените деривати, согласно со методологијата за формирање на цените, се намалуваат во просек за 0,64 отсто, а рафинериските за 0,83. (МИА)