УЈП за власта ќе ги собира парите од казни

Забрзување и поголема наплата на казните е основна цел на предложените дополнувања на Законот за даночна постапка, со кои Управата за јавни приходи ги презема ингеренциите во наплатата на надоместоците и казните од кривични, прекршочни и управни постапки, објасни вчера вицепремиерот и министер за финансии Зоран Ставрески.

Сегашната поставеност на системот, според него, не обезбедувала доволно ефикасна наплата на тие казни.

„Мора да се преземат мерки во делот на законската регулатива за поредовно и понавремено плаќање на казните, со цел да има вистински ефект и тие прекршочни и кривични дела да не се повторат. Ние сметаме дека со тоа ќе се подобри ефикасноста и економските субјекти во кои било случаи ќе бидат поодговорни кон одредбите на законот и на законските обврски, со цел да се спречи нелојалната конкуренција и сите други девијантни појави“, рече Ставрески.

Тој очекува да се зголеми ефикасноста во наплатата и да се забрза процесот, кој од моментот кога ќе се направи прекршокот додека да се плати казната, трае со години.

„Тоа создава лош мотив кај оние што го прекршуваат Законот, бидејќи знаат дека низ судскиот и друг систем таа процедура може да трае предолго. Истовремено се плаќаат високи трошоци ако се ангажираат извршители, а сметам дека во делот на државата тие не треба да се прават, туку да се направи напор преку УЈП да се забрза ефикасноста и да се зголеми наплатата на тие казни“, појасни Ставрески.

Примопредавањето на предметите ќе биде откако ќе се воспостават законските можности.

Првичните пресметки покажуваат дека 140.000 неплатени казни од фирмите и од граѓаните Државното правобранителство ги испратило до извршител, а сега ќе мора да ги префрли во УЈП за наплата. По оваа основа УЈП треба да наплати околу четири милиони евра од граѓаните и фирмите за неплатени казни за судски, прекршочни, парнични, управни спорови, во кои победник е државата, иако ситуацијата е менлива на дневна основа, па и сумата за наплата не е конечна. Тоа во превод значи дека даночниците ќе стапат во акција за наплата на досега неплатените казни на граѓаните за недозволено пушење, плукање, сообраќајни прекршоци, погрешно паркирање, брзо возење, неплатени кривични казни, како и долгови на фирмите кон државата. (А.С.)