Во Шпанија 93 лица заразени од свински грип
ЖЕНЕВА - Лабораториите на Светската здравствена организација (СЗО) потврдија 4.379 инфекции со новиот вид грип Х1Н1, од кој починаа најмалку 49 лица. Официјалниот биланс, кој заостанува во однос на националните извештаи, но се смета за посигурен, опфаќа 45 смртни случаи во епицентарот на болеста Мексико, два смртни случаја во САД и по еден во Канада и во Костарика. Околу 29 земји во светот пријавиле инфекции од новиот вид грип што претставува генетичка комбинација од свински, птичји и човечки вирус. Мексико има 1.626 лабораториски потврдени случаи, САД 2.254, а Канада 280. Костарика, чиј смртен случај е ново дополнување на билансот на СЗО, има осум лабораториски потврдени случаи. Европските земји со најголем број потврдени случаи досега се Шпанија (93) и Велика Британија (39). Други европски земји со инфекции на Х1Н1 се Франција (12), Германија (11), Италија (9), Холандија (3), Ирска (1), Португалија (1), Австрија (1), Данска (1), Шведска (1), Швајцарија (1) и Полска (1). (Ројтерс)
|
