Антимонополистите „за“ законски измени
Комисијата за заштита на конкуренцијата во последните две години изрекла парични казни во износ од 10,5 милиони евра, од кои се наплатени само 12.157, информира вчера претседателот на Комисијата за заштита на конкуренцијата, Чедомир Кралевски, на промоцијата на прирачници од областа на конкуренцијата. Кралевски истакна дека КЗК ќе се обиде да ја подобри наплатата на казните преку промена на законот, која би овозможила изречените парични казни да бидат извршни. Според сегашната законска регулатива, иако незадоволната страна нема право на жалба, има право со тужба да поведе управен спор пред Управниот суд, што пак овозможува одложување на наплатата на изречената казна.
Кралевски вели дека во Македонија веќе не може да се зборува за класични монополи, со исклучок на „природните“, кои се наследени од претходниот систем. „За монопол може да се зборува можеби само во секторот за дистрибуција на енергетика, каде што ЕВН - ЕСМ е монопол, и секторот со железничкиот транспорт, но се надеваме дека со постепена либерализација на пазарот и овие природни монополи ќе добијат конкуренција со повеќе субјекти“, изјави Кралевски. (МИА) |
