Тројно повисоки казни за дивите продавачи
Казна од 13.000 до 16.000 евра ќе плаќаат правните лица за нерегистрирана трговија со стоки, чија продажба не е дозволена на зелените пазари, како и за издавање продажни места на лица кои не се регистрирани за вршење трговска дејност, потоа за необезбеден фискален систем и за продажба на неевидентирана стока. Така предвидуваат најновите измени во Законот за трговија, што вчера ги разгледуваше Комисијата за економски прашања.
За истите тие прекршоци, казните за одговорните лица изнесуваат од 3.000 до 5.000 евра, за службените лица од 1.000 до 3.000 евра, а за повторен прекршок од правно лице казните ќе бидат од 15.000 до 21.000 евра.
„Целта е да се дисциплинираат стопанските субјекти на пазарот. Сакаме превентивно да влијаеме врз спречувањето на нелојалната конкуренција“, рече министерот за економија Фатмир Бесими, образложувајќи ги предложените измени. Тој ги отфрли четирите амандмани по Предлог-текстот поднесени од пратеникот на СДСМ Горан Минчев, кои се однесуваа на намалување на предвидените глоби. Минчев сугерираше Владата да ги приспособи казните на економската ситуација во земјата. Со овој закон, посочи тој, власта практично носи одлука за затворање на пазарите.
Инаку, досегашните казни за сите видови прекршоци во Законот за трговија за правните, одговорните и за службените лица беа од 3.500 до 5.000 евра, од 700 до 1.000 евра и од 300 до 500 евра. |
