Поглед

Зелен срам

Димитар Чулев

И не се вистинити шпекулациите дека зад проектот да се инсталира семафорски „зелен бран“ на „Партизанска“ стои една зелена политичка партија. И дека, наводно, скопскиот придонес за почиста, поздрава и позелена планета бил поздравен од Движењето на здруженијата на зелените низ целиот свет, па дури и од „Гринпис“.

Не е точно ни дека „зелениот бран“ всушност е само една од брановите должни од широкиот спектар на политичкиот нов бран во пресрет и со многунаменска маркетиншка функција пред локалните избори идната година.

Повозрасните генерации скопјани паметат дека „зелен бран“ на „Партизанска“ постоел и во 1970-те. Да бидеме цинични, Западот и Истокот, во тоа време на идеолошки антагонизам, дојдоа до истиот заклучок дека трошокот на возилата без стоење на семафори и при приспособена брзина од 55-60 км/ч е најоптимална, најбезбедна и најекономична варијанта за движење на моторни возила низ град. Значи, нема ништо ново за промоција.

Има само продавање на старото, препакувано и етикетирано како новина во „европска амбалажа“, според европски тренд и европските стандарди.

Кога сме веќе тука, да потсетиме дека и локална самоуправа е само ново име за старите месни заедници, колективните договори ги заменуваат некогашните судови на здружен труд кои ги штитеа правата на работниците, а терминот „соживот“ имаше двокомпонентно име во мултинационалното и мултиконфесионално општество пред 1990-те.

Затоа, господа, нема потреба да промовирате семафори, крстосници, кружни текови и слично како дострел на 21 век. Зашто, му доаѓа на човек да позелени. Ама од срам.