Девојче повредено од скутер на плажа во Струга

Единаесетгодишно девојче од Тетово вчера попладне е повредено од скутер на Машка плажа во Струга. Според полицијата, вчера околу 16 часот во крајбрежниот дел од плажата скутерџија со предниот дел од скутер удрил во А.И. родена 2001 година, при што и нанел лесна телесна повреда на десната потколеница.

Повреденото девојче е пренесено во струшката болница и по укажаната лекарска помош пуштено е на домашно лекување. Веднаш по инцидентот, скутерџијата избегал од местото и го оставил скутерот во вода.

СВР Охрид најави дека од денеска ќе почнат со интензивни патроли по Охридското Езеро во соработка со езерската полиција и Капетанијата, особено на струшкиот дел. Ова е втор инцидент на струшкото крајбрежје за само два дена. Завчера скутерџија повреди 21-годишно момче додека се сончало на педалинка во близина на Машка плажа.