ВМРО-ДПМНЕ и ДУИ уште сега секој на своја страна

Али Ахмети остана во Тетово на денот на роденденската прослава на коалицискиот партнер

Во екот на преговорите за распределба на ресорите, коалиционите партнери ВМРО-ДПМНЕ и ДУИ се секој на своја страна. Интегративците, од кои зависи и идната влада, решија да не се појават на прославата што во петокот ја организираше партијата на Груевски по повод 21. роденден на ВМРО-ДПМНЕ.

Велат дека причината не се преговорите, туку вечерата која за нобел��вецот Ферит Мурат ја организирал лично претседателот на ДУИ, Али Ахмети. Отсуството на ДУИ се коментираше уште на самата прослава, која падна во сенка поради отсуството и на видни амбасадорски фигури што, исто така, не се појавија на прославата на ВМРО-ДПМНЕ. Случајно или не, сето ова се случува во критичната фаза од преговорите меѓу ВМРО-ДПМНЕ и ДУИ, за кои се' уште во јавноста постои дилема дали воопшто се водат или се закочени.

„Да, имавме покана, но не можевме да присуствуваме бидејќи во исто време, во ист ден и ист термин имавме свечена вечера што во чест на нобеловецот Ферит Мурати ја организираше претседателот. Вечерата беше закажана во Маврово и затоа немавме можност да присуствуваме на прославата на ВМРО-ДПМНЕ. Ние ја примивме поканата, им честитавме, но во исто време и ги известивме дека сме спречени да присуствуваме, за што им пренесовме да ги известат и медиумите“, вели Абдулаким Адеми, еден од првите луѓе во ДУИ. Тој вели дека на вечерата биле поканети сите членови на централното претседателство.

Уште на самата прослава имаше коментари зошто меѓу многуте гости што се туркаа да си подадат рака и да им честитаат партиска годишнина на премиерот Никола Груевски и на неговата сопруга Боркица, не се и политичките фигури од ДУИ, довчерашни и идни коалициски партнери на ВМРО-ДПМНЕ.

Додека Груевски говореше на прославата за тоа какви се одлуки ќе бидат изгласани на првата седница на новата влада, во првите редови му ракоплескаа неговите блиски соработници, министрите од редот на ВМРО-ДПМНЕ, Гордана Јанкулоска, Владимир Пешевски, Антонио Милошоски, а тука беа и коалиционите партнери на Груевски од коалицијата „За подобра Македонија“.

Вчера побаравме, но не добивме официјален одговор од ВМРО-ДПМНЕ за отсуството на интегративците. Неофицијално, оттаму ни рекоа дека „имало премногу метеж и дека не можеле да се видат сите луѓе што дошле на прославата“.

Не дојдоа ниту претставниците на клучните амбасадорски места. Со Груевски се ракуваше кинескиот амбасадор, Дон Чунфенг, но тој, според партиските членови и симпатизери, не бил единствениот странец присутен на прославата, на која, наводно, дошле и претставници од српската, хрватската и од турската амбасада.

Забележливо беше отсуството на амбасадорите од земјите партнери на Македонија во светот, САД, ЕУ, Германија, Франција. (Ж.Ѓ.)