Стариот спикер за новиот парламент

Преговорите за идната владејачка коалиција ќе се прекршат преку Собранието

Светлана Унковска

Очекувањата на ДУИ да го добие спикерското местото во парламентот, наводно, ги отвориле комбинаториките во партијата на премиерот Никола Груевски, со цел да се избегне вакво решение што би можело да се протолкува како потклекнување на ВМРО-ДПМНЕ во преговорите. Најновите информации се дека досегашниот претседател на Собранието, Трајко Вељаноски, можеби ќе го води парла��ентот и во наредниот мандат. Партиски извори за „Утрински весник“ потврдуваат дека Вељаноски, најверојатно, нема да се менува од собраниското кормило, иако за него претходно се тврдеше дека ќе седне на министерската фотелја во правда на местото на Михајло Маневски.

Истите извори велат дека постојат две варијанти во преговорите за составување на идната коалиција и за поделба на владејачкиот колач. Според едната, ВМРО-ДПМНЕ нема да сака да и' ја отстапи функцијата претседател на парламентот на ДУИ и во таков случај преговорите ќе бидат тешки и ќе се водат долго, а интегративците ќе бараат многу посилни ресори. Втората опција е ДУИ да ја добие спикерската позиција, која од поодамна се токми резервирана за партиската потпретседателка Теута Арифи, и во тој случај натамошниот коалициски пазар би одел полесно. Оттука се потврдуваат и прогнозите дека почетна точка во преговорите меѓу ВМРО-ДПМНЕ и ДУИ, од која ќе зависи како ќе се движи линијата на распределбата на министерските ресори, е првата фотелја во Собранието.

И покрај процените дека преговорите меѓу ВМРО-ДПМНЕ и ДУИ нема да одат тешко бидејќи се работи за стари партнери, треба да се има предвид дека дека овој пат парламентарната сила на двете партии е намалена, а со тоа и преговорите добиваат специфична тежина. И по две недели откако почнаа средбите меѓу двете работни групи, нема информации за некаков напредок во преговорите. Единствено за што ВМРО-ДПМНЕ и ДУИ имаат постигнато договор е да не даваат информации за преговорите што се водат во најголема тајност. Не се знае и дали интегративците го „проголтале“ назначувањето на директорот на УБК, Сашо Мијалков, на чело на преговарачкиот тим на ВМРО-ДПМНЕ и дали двете групи повторно се состанале. Уште понеизвесно е и кога лидерите на двете партии, Никола Груевски и Али Ахмети, ќе имаат тет-а-тет средба за финален договор за новата влада.

Досегашните информации се дека она од што нема да отстапи ДУИ е заедничка владина програма, како и поизбалансирана поделба на клучните министерски ресори. Неофицијално дознаваме дека ДУИ го бара Министерството за внатрешни работи, но доколку не го добие, ќе инсистира на првата фотелја во Управата за безбедност и контраразузнавање, на која сега е Мијалков. Исто така, ќе се бара и Министерството за финансии, а во тој случај на ВМРО-ДПМНЕ ќе и' припаднат Управата за јавни приходи и Царината. Доколку, пак, Министерството за одбрана и' остане на ВМРО-ДПМНЕ, ДУИ ќе бара да го предводи Генералштабот на АРМ. Исто така, на преговарачката маса се и затворањето на хашките случаи, како и решавање на статусот на борците на ОНА.