Поглед

Бекграунд, фитбек, сиви

Тина Иванова

Баш и не мораше да се брза изборот на нов в.д. директор на „Охридско лето“. И онака програмите и во музичкиот и во драмскиот дел за претстојното фестивалско издание се готови.

По толку денови, месеци, по два распишани конкурса, по толку шпекулации за тоа кое ќе биде името на новиот директор на најпрестижната манифестација за култура, на крајот министерката ја завлече раката во тапанот и оп, извлече нов директор на невидено.

Добро, човеков сега треба да се грижи за парите да стигнат на сметката на Дирекцијата на фестивалот и да излезат безбедно. Дури иако анонимен, со многу факултети и со силно CV и особено како што објасни Канческа- Милевска, „со добар фитбек и бекграунд“.

Во културната јавност сега се толкуваат и се дешифрираат овие квалитативни сознанија за директорскиот избор на министерката. Имаат тема сега културните работници да ги воочат разликите и сличностите меѓу трите странски зборови, кои според министерката, можат соодветно да опишат една личност.

Времето секако бргу ќе ги покаже најавените квалитети на новиот директор на „Охридско лето“. Пред него се шансите да ги оправда министеровските критериуми за тоа што г-динот Мојсовски имал „зад себе навистина многу добар фит бек, бек граунд и сиви и згора на тоа и сето она познавање и на сето оној факултет што го има завршено“.

Не објасни само министерката зошто, покрај толкавите количества квалитети, кандидатот го назначила само за В.Д. Во што овој пат таа не е доволно сигурна кога човекот, еве, подршка му дава и неговата општинска партиска организација. Ако ништо друго, таму барем го знаат и гарантираат за него.