Насловна

Брисел

Полска го презема претседавањето со ЕУ

01.07.2011, 10:13

Полска, која денеска од Унгарија го презема шестмесечното претседавање со ЕУ, како приоритети на својот прв мандат на чело на Унијата ги постави „евроинтеграциите како извор на развој и создавање безбедна и отворена Европа“, со силна поддршка за проширување на Западен Балкан.

Првото претседавање на Полска, која стана членка на ЕУ во 2004 година, ќе биде концентрирано на земјоделската политика, енергетската безбедност, новиот европски буџет за период 2014-2020, јакнење на политиката за европско соседство, но ќе покрене и дебета за „вредностите засновани на учењата на папата Јован Павле Втори“.

Според Лисабонскиот договор ротирачкото претседавање најмногу е цер��монијална функција, а државата која претседава главно е задолжена за создавање рамка за европската агенда и претседавање со состаноците на Советот на министри на ЕУ.

Од друга страна, треба да се има предвид дека поранешниот полски премиер Јержи Бузек е претседател на Европарламентот, а многу важниот сектор за финансиско планирање и буџет му е доверен на Јануш Левандовски, член на Европската комисија од Полска.

Полска претседавањето го презема во момент кога се зголемува загриженоста дека се поистакнатиот популизам и национализам во некои земји членки го доведе во опасност процесот на евроинтеграциите, пред се со доведување во прашање на две работи кои повеќето ги сметаат за најголеми европски достигнувања - Шенгенскиот договор и еврото.

Во рамки на подготовките за преземањето на шестмесечното претседавање, Полска веќе во Брисел отвори нов штаб во кој се вработени повеќе од стотина нови официјални претставници.