Насловна

Признавање

Нa oдмор во Тувалу

Малата држава составена од девет корални острови се наоѓа во Тихиот Океан, северно од Фиџи и брои 10.544 жители

Државата Тувалу не' призна под нашето уставно име - Република Македонија. Во просториите на нашата Мисија во ОН, во средата беа воспоставени дипломатски односи на амбасадорско ниво. Тувалу е 132 земја што официјално ја призна Македонија под уставното име.

Инаку ,Тувалу е една од најмалите држави во светот според бројот на жители, зад неа се само Науру и Ватикан. Тувалу е членка на Комонвелтот и британската кралица е формален шеф на државата. Малата држава составена од девет корални острови се наоѓа во Тихиот Океан, северно од Фиџи. Од она што може да се најде на интернет за Тувалу се податоците дека на островите нема извори ниту постојан тек на вода, а од вегетација има најмногу палми на кокос. Тувалу брои 10.544 жители, кои во 14 век дошле таму од Самоа и Тонга. Првите Европејци што поминале покрај островите биле Шпанци, за кон средината на 19 век таму да пристигнат протестантски мисионери. Денес животот на островите, особено на подалечните, се води најмногу од почитување на религијата.

Тувалу одржува блиски односи со Фиџи и со Австралија. Исто така, одржува дипломатски односи со Република Кина (Тајван), која е единствената земја што има амбасада таму и е еден од најголемите донатори на финансиска помош. САД имаат амбасада на островот Фиџи, која е акредитирана за дипломатски односи со Тувалу. Во 2000 година Тувалу станува полноправна членка на ОН.

Еден од главните приоритети на нацијата Тувалу е глобалното затоплување и можниот пораст на морското ниво. Тувалу е еден од главните двигатели на Протоколот од Кјото и бара целосна негова примена. (Т.Г.)