„Њујорк тајмс“
Обвинението против Строс-Кан пред поништување
01.07.2011, 10:39
Поранешниот шеф на ММФ, Доминик Строс-Кан најверојатно денеска ќе добие извесни олеснувања на условите за кои се товари поради проблеми со веродостојноста на исказите на жената која го обвинува за сексуално насилство, објавија американски медиуми повикувајќи се на изјави на лица блиски до истрагата.
Весникот „Њујорк тајмс“ тврди дека обвинението против Строс-Кан е на раб на поништување откако истрагата открила големи нејаснотии во исказите на хотелската собарка и оти таа најверојатно не кажувала вистини.
Обвинителите се сретнале со адвокатите на Строс-Кан вчера и им ги дале резултатите од истрагата и разговарале за отфрл��ње на потешките обвинувања. Строс-Кан може да биде ослободенод домашен притвор чии мерки чинат околу 200.000 долари месечно.
Истрагата открила проблеми со молбата за азил на 32-годишната африканска имигрантка од Гвинеја, врски со криминални дејности, меѓу кои и трговија со наркотици и перење пари.
Бил преслушан разговор кој жената го имала ден по средбата со Строс-Кан со маж со кого разговарала за обвинението. Мажот приведен за поседување марихуана, е меѓу групата кои во изминатите две години внеле околу 100 илјади долари на нејзина сметка во различни држави.
Таа секој месец плаќала стотици долари за сметки за телефон во пет компании.
Строс-Кан последен пат се јави на суд на 6 јуни кога се изјасни дека не е виновен. Новото рочиште е закажано за 18 јули. Обвинението против него содржи седум точки меѓу кои обид за силување, сексуално злоставување и незаконско затворање. Доколку биде прогалсен за виновен му се заканува затворска казна од 25 години. Строс-Кан (62) беше уапсен на 14 мај на њујоршки аеродром. Се сметаше за водечки кандидат на следните избори за претседател на Франција. Сега е во домашен притвор со електронско следење.
|
