Уапсени Македонци со 111 килограми хероин во Бугарија

Според полицијата, групата криумчарела дрога од Авганистан кон Балканот

Петмина Македонци се уапсени во Бугарија поради шверц на 111 килограми хероин од Авганистан кон Балканот. Во обемната полициска акција за спречување на најголемиот канал за шверц на дрога е уапсен и еден бугарски државјанин, кој бил дел од групата на шверцери со дрога. Според полициските сознанија, тие со две возила планирале дрогата да ја пренесат во земјава, односно во Струга, од каде што потоа требало да биде транспортирана од Албанија од каде што би завршила на европските пазари.

Хероинот бил запленет во специјално координирана акција во околината на Благоевград. Акцијата „Коридор“ била спроведена во понеделникот околу 22,20 часот, кога биле приведени шестмината ја изнесувале дрогата од стан кој бил најмен за нејзино чување. Хероинот бил спакуван во три патни торби во кои имало 111 пакувања, обвиткани со кафеав селотејп.

Притоа, биле уапсени македонските државјани С.Н (50), М.М. (40) од Скопје, Д.Н. (29), Т.Ф. (27), Р.Д. (26) од Крива Паланка и бугарскиот државјанин Л.А. (23) од Благоевград. Според бугарските медиуми, сослушувањето на приведените веќе е започнато. Од македонската полиција потврдуваат дека станува збор за меѓународна акција, чија цел била откривање на каналите за транспорт на дрога од Авганистан преку Турција кон Бугарија и Македонија. Во неа учествувале македонската полиција и бугарската Служба за борба против недозволена трговија со дрога, во координација на СЕКИ-центарот и канцеларијата на ДЕА во Истанбул.

Според полициските сознанија, дрогата требало да биде преземена од македонските државјани и илегално внесена во земјава каде што потоа на подрачјето на Струга требало да биде предадена на извесен албански државјанин кој имал задача да ја изнесе и да ја транспортира кон земјите од ЕУ. Малопродажната це��а на оваа пратка на наркопазарите во Западна Европа се проценува помеѓу 10 и 15 милиони евра. (Д.Т.)