Половина пратеници уста не отвориле

Половината од пратениците во македонскиот парламент се молчаливи и не почувствувале потреба да дискутираат за време на пленарните седници кои директно се пренесуваат преку собранискиот канал. Над триесет парламентарци шест месеци буквално уста не отвориле во Собранието. Ниту една тема не ги испровоцирала овие народни избраници да се јават за дискусија, за реплика или, пак, процедурално да реагираат. речиси четириесет пратеници говореле во парламентот по еднаш или два пати или имале по некој реплика. Ова го покажува извештај за работата на пратениците, „мојот пратеник“, за периодот од јануари до јуни оваа година, што вчера беше презентиран во Собранието.

Меѓу оние кои не кажале ништо во последните шест месеци се и пратеници со по два или три мандати во парламентот, како потпретседателката на Собранието, Светлана Јакимовска, Зоран Петрески, Веле Георгиевски, Ванчо Коцев, Нада Станчевска, Ристо Стојанов -ВМРО-ДПМНЕ, Ристо Пенов-ЛДП, Али Ахмети, Фазли Велиу, Џеват Адеми, Теута Арифи и Блерим Беџети од ДУИ, Арбен Џафери и Мендух Тачи од ДПА, Фијат Цаноски - ПЕИ и Кенан Хасипи од ДПТ. Меѓу новите пратеници кои не се охрабриле за дискусија се Ивица Георгиевски- ВМРО-ДПМНЕ и Имер Селмани - Нова демократија.

Според податоците на извештајот, на седниците посветени на пратенички прашања најактивни биле Јани Макрадули, Тито Петковски и Маријанчо Николов со поставени 11 пратенички прашања, Абедин Зумбери со 10, Владо Бучковски со девет и Весна Бендевска и Менде Димески со по осум пратенички прашања.

Најмногу оправдани отсуство (36) имаат Арбен Џафери и Медух Тачи, по кои следуваат Фијат Цановски со 29, Имер Селмани со 28 и Али Ахмети со 25, додека со најмногу неоправдани отсуство се Назир Буши, Оливер Алексовски и Марија Рашковска. (О.В.)