Државата нема да ги брка дивовселените

Во Битола има уникатен случај – диво вселен е стан од 338 квадрати

Билјана Ангеловска
Оливера Војновска

Новиот Закон за домување им дава неповторлива шанса на оние граѓани кои диво се вселиле во станови што се во сопственост на државата да можат да ги откупат по исклучително поволни услови, без учество и да ги отплатуваат на рати на 25 години. Можноста најверојатно експресно ќе ја искористат најголем дел од бесправно вселените станари, особено оние кои со години „илегално“ живеат во раскошни апартмани со површина од 100 и повеќе квадрати.

Станува збор за 564 станови во Македонија, кои се евидентирани до крајот на 2008 година од страна на Јавното претпријатие за стопанисување со станбен и деловен простор, кои се користат без правен основ, односно без соодветна документација. Можноста за нивно приватизирање е предвидена со член 139 од Предлог-законот за домување, кој вчера повторно се најде пред членовите на собраниската Комисија за транспорт и врски.

„Тоа е голема привилегија, дотолку повеќе што според податоците што ми беа презентирани на мое барање, воопшто не се работи за некои социјални случаи. Имено, многу од овие станови се со површини поголема од 50 метри квадратни “, вели пратеничката Роза Топузова-Каревска од ЛДП.

Според неа, вакви „социјални“ станови во Скопје се евидентирано 120, но 26 од нив се со големина од 90, 105 и 112 квадрати. Во Кочани од 10 станови дури седум се поголеми од 50 метри квадратни, во Штип од пет такви се три, во Струмица од 16 големи се шест, а во Кавадарци еден стан е со површина од 109 квадрати. Во Велес, пак, од 12 евидентирани бесправно вселени станови осум се со голема квадратура, еден од нив има 116 метри квадратни, а друг дури 165. Убедливо најголем дивовселен стан има во Битола, се наоѓа на булеварот „1 мај“ и има 338,32 квадрати.

Иако според условите под кои ќе може да се откупат овие дивовселени станови, всушност, се прави обид тие да се именуваат како социјални станови, сепак, очигледно е дека има и такви кои по никој критериум не би можело да потпаднат под категоријата социјални. Според Топузова Каревска, освен големината на станот, многу битен елемент е и неговата локациска припадност, па оттаму, како што вели таа, воопшто не е безначајно по такви поволни услови што ги нуди новиот Закон за домување да може да се откупи стан на улица „Рузвелтова“ во Скопје, макар бил и со површина од 50-тина метри квадратни.

„До кога ние ќе ги наградуваме, наместо да ги казнуваме оние кои не ги почитуваат законите, а воопшто не се социјални случаи“, се прашува пратеничката Топузова Каревска, чиј амандман за бришење на член 139 од Предлог-законот, Комисијата за транспорт не го прифати.

Сепак, Каревска смета дека не смее да има такво оттуѓување на оваа категорија станови и оти мора точно да се знае кој може да добие социјален стан. Од друга страна, пак, проблемот со социјалните станови да се решава со субвенционирање, а не со давање можност за нивно откупување.