Предупредување
Лучиќ: Нова војна меѓу Хрватите и Бошњаците
07.06.2011, 14:25
Некогашниот шеф на тајната служба на Туѓман, а денес научен соработник на Хрватскиот институт за историја, Иво Лучиќ, деновиве предупреди дека е можна нова војна меѓу Хрватите и Бошњаците во Босна и Херцеговина. И тоа не за десет или дваесет години, туку многу наскоро. "Не е прашање дали можеше да се избегне судирот со Бошњаците муслимани во 90-тите години, туку се поставува прашање дали може да се избегне судир со Бошњаците во блиска иднина? Мислам дека може, но само ако таа опасност сериозно ја сфатиме. Бидејќи, мобилизацијата е веќе на дело. Сите што можете да ги следите дневниците на Хајат и на Федералната телевизија гледате дека тие редовно почнуваат со масовни гробници, убиени деца, жртви што бараат правда и одмазда", изјави д-р Лучиќ.
Лучиќ го кажа тоа на промоцијата на книгата на генералот Слободан Праљак за нападите на Армијата на БиХ врз ХВО од 1992 до 1994 година. Од 2004 година кога Хашкиот суд поднесе обвинение за злосторства во Херцег-Босна, Праљак објави 18 книги во сопствена публикација. Лучиќ е поранешен шеф на херцеговскиот разгранок на ХИС, Хрватската разузнавачка служба, што ја водеше Мирослав Туѓман. Поранешниот разузнавач последниве неколку години и' се посвети на академската кариера.
|
