Насловна

Мистериозна смрт на момче за време на изборната прослава

Во екот на прославата на изборната победа, во центарот на Скопје е пронајден мртов 23-годишник

Дваесет и тригодишно момче мистериозно почина завчера околу полноќ на плоштадот „Македонија“ за време на одржувањето на „Баскер-фест“ и на големата прослава за изборната победа што се одржуваше до доцна во ноќта. Иако плоштадо�� во тоа време бил преполн со посетители, како никој да не забележал што се случувало меѓу толпата. Некои од присутните на плоштадот, велат дека момчето наводно било претепано од полицајци во цивилна облека, но во МВР тврдат дека немаат никаква пријава за случајот.

Според штурите полициски информации, момчето било пронајдено мртво 40 минути по полноќ пред зградата на МЕПСО во близина на градскиот плоштад. Траги на насилство не биле забележани на неговото тело, велат од полицијата,но обдукцијата која е во тек треба да ги утврди причините за смртта. Ниту во полицијата ниту во Институтот за судска медицина во Скопје се' уште нема податоци за идентитетот на момчето. Не се знаат ниту причините за ненадејната смрт.

Некои од посетителите на „Баскер-фест“, кои останале на градскиот плоштад до раните утрински часови, споменуваат дека можеби станува збор за странец. Тие се сомневаат дека момчето било физички нападнато, по што се обидело да бега, но од надлежните органи засега нема официјална потврда за ваков инцидент.

Според официјалните податоци добиени од МВР, момчето на возраст од 23 до 25 години било пронајдено мртво кај зградата на МЕПСО. „Момчето е пронајдено 40 минути по полноќ кај плоштадот ’Македонија‘. Првично нема траги на насилство на неговото тело, кое е предадено на обдукција“, велат од полицијата.

Она што е забележано во полицискиот билтен, по увидот што е направен синоќа, е дека на момчето најпрво му се слошило на градскиот плоштад, по што неколку момчиња го тргнале настрана од метежот. „Починало од непознати причини“, додаваат од МВР.

Скопјанец, кој завчера присуствувал на последното шоу на „Баскер-фест“, вели дека некаде пред полноќ настанала вознемиреност на плоштадот откако се расчуло дека починало момче во близина на бината што е лоцирана кај големиот паркинг, лево од плоштадот.

„Моите другари во еден момент истрчаа кога се слушна дека некое момче е најдено починато во близина. Се зборуваше дека е нападнато од полицијата и дека починало од ќотек. Меѓу присутните се расчу дека момчето тргнало по улицата ’Македонија‘ и дека, наводно, го бркале. Кога стигнал кај плоштадот, наводно, му се слошило, по што починал на клупа“, вели 26-годишен скопјанец, вознемирен од непријатната случка. Според него, се' се случувало околу 12 часот на полноќ, кога изборната прослава била во најголемиот ек.

Организаторите на „Баскер-фест“, пак, велат дека забавата траела и по полноќ, но дека не забележале ништо во близина на бините каде што се одржуваат настапите на артистите. Последното шоу заврши околу 00,40 часот и имаше голем број публика за него. Не забележав ништо, но разговарав и со другите организатори и учесниците на фестивалот, кои, исто така, беа зачудени дека починало момче. Некој од нив да притрчал или да се обидел да му помогне, ќе дознаевме за тоа“, вели еден од организаторите на „Баскер-фест“. Тој додава дека изминатите денови плоштадот бил преполн со млади луѓе, но и гости од странство, кои дошле или за спортските настани или, пак, за културните случувања, кои навечер привлекуваат огромно внимание на кејот на Вардар.

Обдукцијата што се врши во Институтот за судска медицина треба да ги расветли сите нејаснотии околу случајот. Веќе во текот на денешниот ден е можно форензичарите да ги добијат резултатите за причините за смртта, но и да го утврдат идентитетот на несреќното момче. (Д.Т.)