Насловна

Боно Вокс

Борец против сиромаштија, а не плаќа данок

Тој е рок-легенда, а обожавателите го наредуваат и Светиот Боно поради кампањата што веќе долго време ја води против глобалната сиромаштија. Сепак, кога со својот бенд „ЈУ 2“ ќе настапи на фестивалот во Гластонбери, нема да му биде пријатно да ги види демонстрантите што го обвинуваат за избегнување на плаќање на данокот, со кој, меѓу другото, им се помага токму на луѓето што наводно му се толку важни на Боно.

Членовите на групата „Арт анкат“ ќе направат протест на самиот фестивал во Гластонберо, т.е. во текот на настапот на бендот „ЈУ 2“ ќе носат транспаренти со порака „Боно плати“. Исто така, планираат да фрлаат купиште лажни пари на бината.

Протестот го испровоцирала одлуката на „ЈУ 2“ својот мултимилионски музички издавачки бизнис да го преместат од Ирска во Холандија. На тој начин ќе избегнат плаќање данок во Ирска.

Организаторите на протестот ветиле дека нема да бидат насилни и дека нема да го попречуваат настапот на „ЈУ 2“, но дека ќе бидат многу видливи.

Менаџерот на групата Пол Мек Гинис уште порано ситуацијата со данокот ја објаснил вака: „ЈУ 2“ е глобален бизнис и бендот плаќа данок глобално. Барем 95 отсто од работата се одвива надвор од Ирска и како резултат на тоа плаќаме многу видови даноци во целиот свет“.