Насловна

Гем, сет и меч за Груевски

Никола Груевски за нецели пет години третпат ќе биде крунисан за премиер

Соња Крамарска



Владејачката ВМРО-ДПМНЕ по четврти пат однесе победа на изборите во Македонија, а по третпат е тоа победа на парламентарни избори, или втора победа на вонредни парламентарни избори. Македонската десница триумфира, иако според случувањата во државата и оцените што ги добива земјава од меѓународната сцена, текот на настаните не е поволен.

Груевски веднаш по објавата на резултатите рече дека победата е признание за спроведените реформи и за чесната политика. „Оваа победа значи дека мнозинството граѓани препознаа дека ВМРО-ДПМНЕ и во кризата и во тешки околности покажа дека знае да се справи со најтешки проблеми со најмала можна штета и дека на Македонија и' се случи нов момент во политиката, со доаѓањето на нова политичка гарнитура од 2006, која постави нови стандарди на политиката во Македонија“, рече тој.

Првите реакции кон изборниот резултат, пак, на неутрални посматрачи, се дека Црвенковски одбра погрешна тактика за пораз на политичкиот ривал или можеби не сфати дека клучот за пораз на ВМРО-ДПМНЕ лежи во неговото повлекување од лидерското кормило. Црвенковски го постави во погрешен тајминг и прашањето за предвремени избори, всушност, давајќи и' на Владата на Груевски ветер во едрата наместо да ги нападне нејзините слабости и да ја порази.

Некои, пак, работите ги посматраат едноставно. „Нема посебна анализа, туку едноставно, гласачите сметаат дека политиката што ја води ВМРО-ДПМНЕ е подобра од политиката што им ја нуди СДСМ“, вели комуникологот и политички аналитичар Петар Арсовски.

Дали изборите се одржаа прерано за опозицијата и токму навреме за ВМРО-ДПМНЕ, чија слаба политика во изминатите пет години веќе резултираше со незадоволство кај граѓаните? Сигурно дека одговорот е позитивен, но она што допрва треба да се дознае е зошто Црвенковски брзаше со изборите, иако сите анкети покажуваа дека предноста на ВМРО-ДПМНЕ е се' уште недостижна за СДСМ.

Објавувајќи ја победата, Груевски триумфално ќе воскликне дека е награден за посветена работа. „Народот не сака во иднина да биде изневеруван како што му се случуваше некогаш во минатото, затоа им ја даде поддршката на луѓето за кои забележа дека во овие 4,5 години навистина дадоа максимум што можеа да го испочитуваат она што го ветија“, рече тој во првите мигови од победничкото славење.

Но, вистинската анализа на четвртиот триумф едноподруго на македонските националисти како што ја викаат Владата на Груевски во Брисел, можеби треба да се бара во првата порака што ја прати ВМРО-ДПМНЕ до македонските граѓани веднаш по пребројувањето на гласовите: „Не грижете се, бидете спокојни, татковината е во сигурни раце. Никола Груевски и натаму ќе биде премиер на Македонија“, рече Влатко Ѓорчев, кој и самиот триумфираше во Изборната единица 3 каде што е носител на кандидатската листа за пратеници.

За каква загроза на татковината зборува Ѓорчев? Па за името, се разбира, и политиката на непопуштање кон барањата на јужниот сосед што ВМРО-ДПМНЕ вешто ја нагласи во текот на целата кампања, која е круна на нивното тригодишно одбивање да направат компромис за името.

За оние што знаат да читаат, а не само да слушаат политички кампањи, беше јасно уште во почетокот на изборите дека ВМРО-ДПМНЕ ја смета својата политика кон името за сигурен изборен влог. Безмалку за џокер, кој ако треба, ќе биде употребен. „Нема да пропуштиме можност да споменеме таму каде што е потребно и за ангажманите и влогот што го имаме направено во промоцијата и заштитата на македонските национални и државни интереси на меѓународен план и очекуваме фер и чесен натпревар со нашите политички соперници“, рече шефот на дипломатијата, Антонио Милошоски, на самиот старт на кампањата.

„И спомениците, земјоделските субвенции и националпатриотизмот - се нешто што изгледа им се допадна на гласачите“, додава комуникологот Петар Арсовски. Но, сепак, вели тој, јасно е од резултатот и дека гласачите ги наградија промените и во СДСМ.

Веројатно, ќе следат и резултати дали во победата на ВМРО-ДПМНЕ имаат придонес и малите дваесетина партии. Ќе остане енигма и зошто опозицијата не се ни обиде да го спречи внесувањето на дијапоспората во изборните математики на ВМРО-ДПМНЕ, иако уште отпочеток е јасно дека стануваше збор за политички маневар со цел да се засили гласачкото тело на владејачката партија. „Посебна благодарност за поддршката од македонската дијаспора, со која 20 години ВМРО-ДПМНЕ има комуникација, размена на мислења и огромна почит“, рече Груевски во својот победнички говор.

„Утрински весник“ уште во првата анализа кон Манифестот на ВМРО-ДПМНЕ што го објавија на стартот на кампањата оцени дека неговата содржина е, пред се', наменета на посиромашните слоеви граѓани, кои не ги интересира високата политика, а кои доминираат во земји со низок развој, како што е Македонија. ВМРО-ДПМНЕ наместо членство во НАТО и во ЕУ, кои ќе бидат недостижни, понуди субвенции во земјоделството, повисоки пензии, поевтини станови, достижно образование и за богатите и за сиромашните, повисоки плати за администрацијата.

Најновата победа на ВМРО-ДПМНЕ покажа дека Груевски обединува една голема политичка сила, која според сите истражувања, е против промена на името, а за возврат бара сосема малку. Груевски воспостави дијалог со невработени, стечајци, земјоделци и пензионери, кој за оние што се нарекуваат македонска елита, се' уште се води на неразбирлив јазик.

Тоа на македонскиот премиер му е совршено јасно и затоа ликува. „За нас оваа победа и оваа поддршка има многу поголемо значење и сила отколку сите досегашни победи бидејќи доаѓа по речиси пет и повеќе години во исклучително тешко време, по две блокади за НАТО и за ЕУ“, рече тој во победничката еуфорија.