Насловна

ЕДИТОРИЈАЛ

Груевски и Ахмети остануваат партнери

Тамара Грнчароска

Со речиси идентичните соопштенија за конструктивната атмосфера на дијалогот што го водат за формирање на новата македонска влада, ВМРО-ДПМНЕ и ДУИ ги закопаа шпекулациите дека социјалдемократите се во каква било комбинација за формирање коалициска влада со помош на интегративците.

Соопштенијата што имаа дури и идентичен број редови, полни со зборови за партнерство и доверба, треба да ги замолкнат и муабетите дека коалициони партнери се во криза околу формирањето на новата влада, пред се', поради зголемените апетити на ДУИ во прераспределбата на институционалните фотелји, но и поради наводите дека шефот на УБК, Сашо Мијалков, е на чело на преговарачкиот тим на ВМРО-ДПМНЕ. Сите информации што кружат во медиумите овие денови се неосновани шпекулации, велат во соопштението на ДУИ, додека ВМРО-ДПМНЕ тврди дека разговорите се одвиваат во фер и конструктивна атмосфера.

Но, токму големата тајност и немањето дури ни „валидни“ кулоарски шпекулации за тоа кој на која министерска позиција ќе се смести, остава простор за толкување дека двата партнера се' уште ги немаат испеглано работите околу тоа - што нудат едните и што точно бараат другите.

Кусокот од неколку пратенички места за ВМРО-ДПМНЕ до мнозинство во парламентот несомнено ја зајакна позицијата на ДУИ во составувањето на новата влада и ги зголеми барањата. Образование, дипломатија, полиција, УБК, се ресорите за кои се вртат муабети дека албанскиот партнер на Груевски фрлил око. Но, речиси е сигурно дека по неуспехот во 2008 година од ВМРО-ДПМНЕ да го добие спикерското место во Собранието, сега ДУИ нема лесно и евтино да се откаже од именување свој човек на втората позиција во државата. Потпретседателското место на собранискиот спикер, кое како утешна награда го добија пред три години, не е веќе во игра за интегративците.

Новата улога на ДУИ како билет за Груевски за формирање влада, освен што ја засили позицијата за политичко пазарење на Али Ахмети, а со тоа и меѓукоалициските превирања околу составот на идната влада, покажува дека ДУИ сега ќе биде малку повеќе од само декор на „Илинденска“. Веќе не е прашање дали, туку колку ќе успее да инкорпорира ДУИ од своите барања во новата владина програма.

Затворањето на хашките случаи, решавањето на статусот на борците на ОНА, кои трпеливо како прашања чекаа „подобри“ времиња за албанските партии во власта од она што го имаа до 2008 година, ќе бидат високата сметка што ќе му се испорача на Груевски за поддршка од ДУИ, но и од која било друга партија од албанскиот блок.

Неизвесно е што ќе се случи со предизборните ветувања на ДУИ дека за влез во новата влада ќе бараат конкретни рокови за решавање на спорот за името за побрзо евроатлантско интегрирање на Македонија. Практиката покажа дека инсистирањето на НАТО и на ЕУ досега беше само партиска реторика со слаба реализација, особено откако партиите ќе се вселат во зградата на „Илинденска“.

ВМРО-ДПМНЕ и ДУИ потврдија дека се' уште се партнери, останува да видиме колкава ќе биде цената за тоа.