Скопје
Масовен протест против полициската бруталност
19.06.2011, 15:58
Концерти и марш по скопските улици против полициската бруталност - вака младите го одбележуваат 14-от ден протести за смртта на Мартин Нешковски. Од зад споменикот на Мајка Тереза ечеше музика, но велат не за забава туку во знак на протест.
Ние сме и ќе останеме слободно и независно граѓанско движење кое бара правдата да излезе на виделина, велат демонстрантите.
Истовремено ги отфрлаат обвинувањата на групата младинци кои вчера тврдеа дека протестот бил злоупотребен од СДСМ и најавија свој протестен марш, но од Мајка Тереза до Бихаќка.
На петицијата стоп за полициската бруталност се потпишуваа и млади и стари.
- Јас сум родител. Они повикаа родители на деца. Потполно исправно, бидејќи не се работи за политика.
- Младите се сосема во право бидејќи вакви случаи како овој со младиот Нешковски се повторуваат без последици и поуки.
Високите температури ги натераа граѓаните да се засолнат под сенките и оттаму да ги следат случувањата зад спомен куќата на Мајка Тереза.
По настапите на шест бендови следуваше марш по улиците на Скопје. Од Мајка Тереза до Влада преку мостот Гоце Делчев пред обвинителството и на крај пред Собранието.
Дел од барањата на демонстрантите се расветлување на убиството и сите инволвирани полицајци, оставки од сите министерката и другите одговорни во МВР, замена на секторот на внатрешна контрола во МВР со независен систем на контрола. Од МВР одговорија дека станува збор за поединечна одговорност на убиецот, а не за вина на целиот полициски апарат. Нивен аргумент е што полицијата во многу кусо време помало од 24 часа го решила случајот и го открила полицаецот
|
